КъБР-м Iэтащхьэ КIуэкIуэ Казбек видеозэ­пы­щIэныгъэкIэ хэтащ Урысей Федерацэм и Къэ-рал Советым «ЩIалэгъуалэмрэ сабиймрэ» яху­хэха и комиссэм и зэIущIэм. Ар иригъэкIуэкIащ Ямало-Ненецкэ автоном округым и губернатор, комиссэм и унафэщI Артюхов Дмитрий.

Зэхуэсым щытепсэлъыхьащ «ЩIалэгъуа­лэмрэ сабиймрэ» лъэпкъ IуэхущIэм лъабжьэ хуэ­хъум, ар етIанэгъэ зэрырагъэжьэнум. Иджыпсту щIалэгъуалэм теухуауэ ирагъэкIуэкI лэжьыгъэм зэрыпащэнур зи жэрдэмыр  Урысей Федерацэм и Президент Путин Владимир. 
Мы лэжьыгъэр тегъэпсыхьащ дэтхэнэ зы цIыхуми и зэфIэкIыр гъащIэм къыщигъэсэбэпыфын ­хуэ­дэу гъэсэным, зегъэузэщIыным, хэкупсэу, жылагъуэм я пащхьэ щихь жэуаплыныгъэр зыхищIэу къэгъэхъуным. Нэхъыбэу зыхуэунэтIари шко­лакIуэхэрщ, колледжхэмрэ еджапIэ нэхъыщ­хьэхэмрэ щIэс студентхэрщ, IэщIагъэлI ныбжьы­щIэхэрщ. Апхуэдэу ди къэралым исщ цIыху мелуан 50, ар Урысейм щыпсэум и Iыхьэ щанэ хуэдиз мэхъу. 
Лэжьыгъэм хуагъэбелджылащ федеральнэ программэу 9: «Урысейр  Iэмалхэм я къэралщ», «Дэ дызэкъуэтщ», «Дунейм Урысейм щиубыд увыпIэр», «НэхъыфI псори - сабийхэм», «Школ нэхъыфIхэр», «ЕгъэджакIуэхэмрэ гъэсакIуэхэмрэ», «Профессионалитет», «Иджырей кампусхэм я зэпыщIэныгъэр къызэгъэпэщын», «Пашэхэм я университетхэр».
Проектыр ягъэзэщIэнущ Урысейм ЦIыхубэм щIэныгъэ егъэгъуэтынымкIэ, ЩIэныгъэмкIэ, ЩэнхабзэмкIэ, ФинансхэмкIэ и министерствэхэм, «Рос­обрнадзор»-м, Пашэхэм я зэщIэхъееныгъэм, «Еди­ный заказчик» ППК-м, РАНХиГС-м, «Сириус» федеральнэ щIыналъэм. Iуэхур и нэIэ щIэтынущ УФ-м и Правительствэм и УнафэщIым и къуэдзэ Чернышенкэ Дмитрий.
Къэрал советым и комиссэм хэтщ щIыналъэ, федеральнэ министерствэхэм, къулыкъущIапIэхэм я лIыкIуэхэр, щIалэгъуалэ зэгухьэныгъэхэм я уна­фэщIхэр.
«IуэхущIэ къетхьэжьэм и мыхьэнэр къып­хуэ­мылъытэн хуэдизу инщ: ар зэрекIуэкIыну илъэсихым Къэбэрдей-Балъкъэрми къэрал псоми илъэсипщI бжыгъэкIэ къахуэщхьэпэн IуэхуфI куэд ­з­э­фIэ­кIынущ. Ди республикэм Iуэхур тэ­мэму ­щызэ­фIахын папщIэ IуэхущIапIэхэри къы­­зэгъэ­пэщыныгъэ лэжьыгъэхэри щызэтеублащ, ЩIалэгъуалэ IуэхухэмкIэ министерствэр къы­зэдгъэпэщащ, мэлажьэ, абы и къудамэхэм райо­нхэм жыджэру Iуэху щащIэ. «ЩIыналъэхэр зейр щIалэгъуалэращ» программэм ипкъ иткIэ, щIалэгъуалэ центрхэр духуащ, «Росмоло­дежь»-м и фIыгъэкIэ республикэм щIалэгъуалэ куэд зыхэт зэхуэ­сыш­хуэхэр щокIуэкI. А псом къи­щынэмыщIауэ, ди щIыналъэм щыдгъэзэщIэну программэхэр зэхыдолъ­хьэри, ари ныбжьы­щIэхэмрэ сабийхэмрэ къахуэсэбэпын хуэдэу идогъэкIуэкI. Абыхэм ящыщу нэхъ иныр «ЛIы­хъужьхэм я бынхэр» программэрщ, абы дзэ Iуэху хэхам щыIэ сэлэтхэм я бынхэр зыхуей хуэзэнымкIэ, щIэныгъэ ягъуэтынымкIэ мы­хьэ­нэшхуэ иIэщ. «Iуащхьэмахуэ» корпоратив университетым и егъэджэныгъэ программэм ипкъ иткIэ, щIалэгъуалэм ядэлажьэ егъэджа­кIуэхэмрэ гъэсакIуэхэмрэ я Iэзагъым хыдогъахъуэ», - жиIащ КIуэкIуэ Казбек.