Къэбэрдей-Балъкъэрым спортымкIэ и министр Хьэсанэ Ислъам иджыблагъэ къыщыпсэлъащ КъБР-м и ЦУР-м и «эфир занщIэм» икIи и гугъу ищIащ зи унафэ ищI IэнатIэм иригъэкIуэкI лэжьыгъэхэмрэ спортым и Iуэхур зыIутымрэ. Псалъэм папщIэ, Налшык къалэм щаухуащ щхьэ зытелъ, IэрыщI мыл зэрылъ спорт комплексыр. Дызэрыт илъэсым и кIэм ирихьэлIэу ар лажьэу ирагъэжьэнущ, къэнэжар абы щхьэкIэ зыхуэныкъуэну дэфтэрхэр хьэзыр хъунырщ.
Спорт-техникэ обрудованэхэр къащэхуащ икIи щагъэуващ Прохладнэ къалэмрэ Балъкъэр Ипщэмрэ щыIэ, спорт утыку «губзыгъэ» жыхуаIэхэм папщIэ. ГъэщIэгъуэнщ а щIыпIэхэм апхуэдэу щIеджэри - и щхьэусыгъуэр спорт Iэмэпсымэхэр интернетым пыщIауэ щытщ икIи абы зыпумыдзауэ ахэр лэжьэнукъым икIи къыпхуэгъэсэбэпынукъыми аращ. Абы къикIращи, спортым зыхуэбгъасэм и мызакъуэу, уи акъылми зебгъэужьынущ, зэманым къигъэувхэм уадэбэкъуэн хуей хъунущ. Хъущтэ-Сырт щыIэ апхуэдэ спорт IуэхущIапIэми зыхуэныкъуэну оборудованэхэр къызэрыхуащэхун ахъшэ бюджетым къыхэкIащ.
Хьэсанэ Ислъам тепсэлъыхьащ щIыналъэм и спорт инфраструктурэм зегъэужьынымрэ спортсмен лъэщхэр гъэхьэзырынымрэ ехьэлIауэ ирагъэкIуэкI лэжьыгъэхэми. НобэкIэ республикэм щолажьэ олимпиадэхэм хэтыфыну зэчий зыбгъэдэлъ ныбжьыщIэхэр щыхуагъасэ спорт еджапIэу 14. Псалъэм папщIэ, абыхэм щагъэхьэзыр Олимп джэгухэм хыхьэ спорт лIэужьыгъуэхэу боксымкIэ, бэнэкIэ хуитымрэ алыдж-урым бэнэкIэмкIэ, дзюдомкIэ, нэгъуэщIхэмкIи.
Апхуэдэуи Къэбэрдей-Балъкъэрым щолажьэ спорт еджапIэу 47-рэ, спорт зэмылIэужьыгъуэхэмкIэ республикэм и командэ къыхэхахэр щагъэхьэзыр центрыр. Абыхэм зыщагъасэ цIыху мин 27-м, абыхэм ящыщу мин 22-м щIигъур Олимп джэгухэм хыхьэ спорт лIэужьыгъуэхэм хэтщ. Спортсменхэм ядолажьэ тренер-егъэджакIуэу 700-м щIигъу.
IэрыщI мыл зэрылъ спорт комплексым теухуауэ министрым аргуэру къыхигъэщащ ар 2022 гъэм яухуэн зэрыщIадзар, хоккеймрэ мылым къыщыфэнымрэ зэрыхуащIар. Ауэ, абыхэм къадэкIуэу, лъэрыжэкIэ къэзыжыхьын, джэгун зыфIэфIхэм щхьэкIи и бжэр зэIухауэ щытынущ, спорт Iэмэпсымэхэри пIалъэкIэ къыIахыу къагъэсэбэпыфынущ.
Республикэм и цIыху нэхъыбэ спортымрэ физкультурэмрэ къыхэшэным теухуауэ екIуэкI лэжьыгъэхэми Хьэсанэр тепсэлъыхьащ. Министрым жиIащ сабийхэмрэ щIалэгъуалэмрэ куэду къызэщIэзыубыдэ спорт Iуэхугъуэхэр илъэс псокIэ щIыналъэм зэрыщрагъэкIуэкIыр. Абы хохьэ, псалъэм папщIэ, спортымрэ узыншагъэмрэ я махуэхэр, Самбэм и урысейпсо махуэр, Урысейпсо олимп махуэр, Уэрам баскетболымкIэ урысейпсо зэхьэзэхуэр, къызэдэжэнымкIэ «Лъэпкъым и кросс» зэпеуэр, «Футбол цIыкIу», «Фэ топ» республикэ зэхьэзэхуэхэр, нэгъуэщIхэри.
Хьэсанэм къыхигъэщащ ехъулIэныгъэфIхэр къэзыгъэлъэгъуа спортсменхэмрэ абыхэм я тренерхэмрэ зэрагъэпажэ ахъшэм и куэдагъым Къэбэрдей-Балъкъэрым и Iэтащхьэ КIуэкIуэ Казбек и унафэкIэ къызэрыдыщIагъуар. 2022 - 2023 гъэхэм спортсмен 1100-м апхуэдэ гулъытэхэр ягъуэтащ. 2024 гъэм зэфIэкI лъагэхэр зиIэ спортсменхэмрэ абыхэм я тренерхэмрэ зэхэту сом мелуан 90-м нэблагъэ иратащ.
Апхуэдэуи министрыр тепсэлъыхьащ щхьэ телъу теннис ущыджэгу хъун комплекс Налшык къалэм, Безенги къуажэм спортзал щаухуэнкIэ щыIэ Iэмалхэм, паралимпийскэ спортым зегъэужьыным, зи узыншагъэм сэкъат зиIэхэм спортым ныкъусаныгъэншэу зыхуагъэсэн папщIэ ялэжьхэм, нэгъуэщIхэми.
Зытхыжар ХЬЭЩЫКЪУЕЙ Олегщ.
