Хэкум и ЛIыхъужьхэм я махуэм Налшык къалэм Iуэ­ху­гъуэ гуапэ зыбжанэ щекIуэ­кIащ. Абыхэм ящыщт «ЛIыхъужьхэм я уэрам» зыфIащар. Урысейм и ЛIыхъужь Тэмазэ Тимур и фэеплъ пхъэбгъур зыфIэлъ унэм деж щызэхуэсахэр тепсэ­лъы­хьащ ди лъахэгъум и лIыгъэм.

ПэкIум хэтащ студентхэр, школакIуэхэр, «ТекIуэныгъэм и волонтёрхэр», «Пашэхэм я зэщIэхъееныгъэ» жылагъуэ зэгухьэныгъэхэм хэтхэр, лIыхъужьым и Iыхьлыхэр.
Къызэхуэсахэм захуигъэзащ КъБР-м щIалэгъуалэм я IуэхухэмкIэ и министр Лу Азэмэт. Абы жиIащ «ЛIыхъужь­хэм я уэрам» Iуэхур иджы етI­уа­нэу зэрырагъэкIуэкIыр икIи хабзэ дахэ ящIыну зэрамура­дыр. Министрым къыхигъэщащ апхуэдэ зэхуэсхэм хэкуп­сэ гъэсэныгъэ мыхьэнэи зэра­Iэр.
ПэкIум хэтахэм ягу къагъэкIыжащ лIыхъужьым и ­гъуэгуанэр. Тэмазэ Тимур 1990 гъэм жэпуэгъуэм и 25-м КъБР-м и Прохладнэ щIыналъэм хыхьэ Къэрэгъэш къуа­жэм къыщалъхуащ. 2008 гъэ лъандэрэ УФ-м и дзэм хэту къулыкъур ирихьэкIырт. Сирием щыIэу, дунейпсо щIэпхъаджащIэхэм япэщIэтащ. 2022 гъэм мазаем и 22-м щегъэжьауэ Тэмазэ Тимур езым и гупым и гъусэу хэтащ дзэ Iуэху хэхам. ФокIадэм и 11-м Костромкэ къуажэм деж щекIуэкIа зэхэуэм уIэгъэ щыхъуауэ, Тимур зауэ губгъуэм кърахыжри, дзэ-транспорт кхъухьлъатэкIэ тылым щыIэ сымаджэщым яшауэ щытащ. ЩIалэм телъ уIэгъэхэм къа­хуемыгъэлу, фокIадэм и 17-м дунейм ехыжащ.
ЛIыхъужьым и адэ къуэш Тэмазэ Замир жиIащ щIалэр сыт щыгъуи и къалэныр нэгъэсауэ зэригъэзэщIэным ­хущIэкъуу, Хэкум и шына­гъуэншагъэм тегузэвыхьу зэры­щытар. «Абы и гъащIэр щIитащ дунейр мамыру, бэIу­тIэIуншэу щытыным. ЩIа­лэгъуа­лэм нобэ захуэзгъазэу яжесIэну сыхуейт иужькIэ зытемыукIытыхьыжын гъащIэ гъуэгуанэ якIуным дэтхэ­нэри иужь итын зэрыхуейр», - къыхигъэщащ нэхъыжьым.
Хэку зауэш­хуэм ТекIуэныгъэр къы­зэрыщытхьрэ илъэс 80 зэ­ры­рикъум теухуа дунейпсо волонтёр корпусым и центрри а махуэм Къэбэрдей-Балъкъэрым къыщызэIуахащ. Республикэм и щIа-лэгъуалэ 1500-рэ Iуэхум щы­хуа­гъэхьэзырынущ абы. 
Лу Азэмэт зэрыжиIэмкIэ, Iуэху­щIапIэм и лэжьыгъэр цIы­хухэм, псом хуэмыдэу щIэб­лэм, тхыдэ фэеплъхэр егъэхъумэнымрэ хэкупсэу къэгъэхъунымрэ хуэгъэзащ. Къудамэм и унафэщIу щытынущ дзэ Iуэху хэхам хэтхэмрэ ветеранхэмрэ. «2025 гъэм Iэтауэ дгъэлъэпIэнущ ТекIуэныгъэм Иным и илъэс 80-р. Абы и щIыхькIэ екIуэкIыну Iуэхухэр къызэгъэпэ­щы­ным щIалэгъуалэри къыхэт­шэным мыхьэнэшхуэ иIэу къыдолъы­тэ», - жеIэ минист­рым.
КЪАНЩАУЭ  Мэлычыпхъу.
Сурэтхэр Къарей Элинэ трихащ.