Хэкум и ЛIы­хъужьхэм я махуэм теухуауэ Iуэхугъуэ щхьэпэхэр Аруан щIыналъэм и жы­лэхэм щрагъэкIуэкIащ. Нарт­къалэ дэт МафIэ мыужьыхым, афган зауэм щыIахэмрэ абы хэкIуэдахэмрэ я фэеплъхэм деж пэкIу щызэхашащ. Абы щыIащ Аруан щIыналъэ администрацэм и лэжьа­кIуэхэр, прокуратурэм, МВД-м, ФСБ-м я лIыкIуэхэр, щIыпIэ само­управленэмкIэ Советым, жылагъуэ советым, Зауэм и ветеранхэм, Афганистаным и ветеранхэм я зэгухьэныгъэхэм хэтхэр, юнармейцхэр, еджа­кIуэ цIыкIухэр. 

Аруан щIыналъэ ­адми­нис­трацэм и уна­фэ­щIым и ­къалэнхэр пIалъэкIэ зыгъэзащIэ ЛIыжьыкъуэ Хьэзритрэ щIыналъэм и ветеранхэм я зэгухьэныгъэм и тхьэмадэ Езий Юрэрэ къыщыпсалъэм къы­хагъэщащ Хэкум и ЛIы­хъужьхэм я махуэр къэралыр яхъумэу лIыгъэ зезыхьахэм, я псэ, узыншагъэ емы­блэжахэм зэрахуэгъэпсар икIи ехъуэхъуащ ди къэралыр бийм щахъумэу дзэм къулыкъу щызыщIахэм, нобэ ар езыхьэкIхэм, дзэ Iуэху хэхам хэтхэм. 
А махуэ дыдэм «Нарт» щIалэгъуалэ центрым къы­щызэIуахащ «ЛIыхъужьхэм я блыныр». Абы хэтащ ­КъБР-м бжыгъэхэр зи лъабжьэ зыужьыныгъэмкIэ, связымрэ цIыхубэ зэпы­щIэныгъэхэмкIэ и министр Бозий Аскэр, КъБР-м щIалэгъуалэм я IуэхухэмкIэ и министрым и къуэдзэ Бжьэ­дыгъу Мурат, Аруан щIыналъэ администрацэм и уна­фэ­щIым и къуэдзэхэу Зыхьэ Ахьмэдрэ Мер Рустамрэ, дзэ Iуэху хэхам и ветеранхэу Бахъуэ Рэмэзанрэ КIэрэф Сослъэнрэ, щIалэгъуалэ центрым и лIыкIуэхэмрэ еджакIуэхэмрэ. 
ПэкIум щIидзэн и пэ къихуэу Урысей Федерацэмрэ Къэбэрдей-Балъкъэрымрэ я гимнхэр къеуащ. ИужькIэ, Мер Рустам къыщыпсалъэм къыхигъэщащ «ЛIыхъужь­хэм я блыныр», Хэку зауэ­шхуэм хэтахэм я сурэтхэр зытетыр, КъБР-м ЩIалэ­гъуалэм я IуэхухэмкIэ и министерствэмрэ УФ-м ЩIалэгъуалэм я IуэхухэмкIэ и агентствэмрэ я дэIэпы­къуныгъэ хэлъу республикэм Iуэхугъуэ зэхуэмыдэхэр щрагъэкIуэкI и ЩIалэгъуалэ центрым къызэрызэригъэ­пэщар икIи лIыгъэ зезыхьахэм я фэеплъу, къытщIэхъуэ щIэблэми щапхъэ яхуэхъуу зэрыщытынур.
Къызэхуэсахэм Хэкум и ЛIыхъужьхэм я махуэмкIэ ехъуэхъуащ Бозий Аскэр икIи щIалэгъуалэр къыхуриджащ нэхъыжьхэм зэрахьа лIыгъэр, тхыдэр зыщамыгъэгъупщэну, хэкупсэу, фIы­щIэрэ пщIэрэ ящIу къэтэ­джыну. 
- Хэку зауэшхуэр зэриухрэ илъэс куэд дэкIащ, ауэ долъагъу фашизмэм и щхьэр аргуэру къызэриIэтар. ЛIыгъэ зэрахьэу нэмыцэ зэрыпхъуакIуэхэм езэуахэм я щIэблэхэр нобэ украин фашистхэм япэщIэтщ, - жиIащ Бжьэдыгъу Мурат.
А псалъэхэм пэджэжырт дзэ Iуэху хэхам и ветеранхэу, «И хахуагъэм папщIэ» медалыр зратахэу Бахъуэ Рэмэзанрэ КIэрэф Сослъэнрэ: Хэку зауэшхуэр зылъэмыIэса унагъуэ Къэбэрдей-Балъкъэрым искъым, иджы къэралыр яхъумэу ди щIалэхэр дзэ Iуэху хэхам щы­-Iэщ. 
«ЛIыхъужьхэм я блыныр» къызэIухын пщIэр лъагъэсащ Бозий Аскэррэ КIэрэф Сослъэнрэ. Къызэхуэсахэм абдеж удз гъэгъахэр щагъэтIылъащ икIи фэеплъ сурэтхэр зытрагъэхащ. Ап­хуэдэуи дзэ Iуэху хэхам и ветеранхэр щыхьэщIащ ЩIалэгъуалэм я центрым икIи еджакIуэ цIыкIухэм я упщIэ куэдым жэуап иратащ.
Хэкум и ЛIыхъужьхэм я махуэр щагъэлъапIэм ирихьэлIэу Шэрэдж Ищхъэрэм щекIуэкIащ «ЛIыхъужьым и уэрам» Iуэхугъуэ щхьэпэри. Абы хэтащ къуажэм и курыт еджапIэ №1-м, Совет Союзым и ЛIыхъужь Иуан Хьэсэн и цIэр зезыхьэм, Къэбэрдей-Балъкъэр мэ­къумэш колледжым, Бэракъ Плъыжь орденым и нагъыщищыр, Ушаковым и орденым и етIуанэ нагъыщэр зыхуагъэфэща Хьэмгъуокъу Башир и цIэр зезыхьэм, щеджэхэр, лэжьыгъэмрэ зауэмрэ я ветеранхэр, щIыпIэ администрацэм и лэжьа­кIуэхэр. 
Иуан Хьэсэн и фэеплъым деж ягу къыщагъэкIыжащ лIыгъэ зезыхьэу зауэм хэта я къуажэгъухэр. Абыхэм я цIэхэр зэрахьэ еджапIэ­хэм­рэ уэрамхэмрэ. Къуа­жэ­дэс­хэм нобэми ящыгъу­п­щэр­къым афган зауэм лIыгъэ зэрахьэу хэкIуэда Мер Хьэ­сэнрэ Iэщын Замиррэ. Ап­хуэдэуи фIыщIэ хуащI ­Хэкур яхъумэу дзэ Iуэху хэхам нобэ щыIэ я лъахэгъухэми. 
ЛIыхъужьхэм я махуэм ­теухуа зэхуэс щекIуэкIащ Совет Союзым и ЛIыхъужь Яхуэгуауэ Михаил и цIэр зэрихьэу Псыгуэнсу къуа­жэм дэт курыт еджапIэ ­№1-м. Абы щытепсэлъы­хьащ я къуажэгъу цIэрыIуэм Хэку зауэшхуэм щызэрихьа лIыгъэм, иужькIэ еджакIуэ цIыкIухэр щыIащ ЛIыхъу­жьым и унэм, абы и цIэр зезыхьэ уэрамым тетым, и фэеплъ пхъэбгъур зыфIэ­дзам. 
Апхуэдэ зэхыхьэхэр ще­кIуэкIащ Аруан щIыналъэм и адрей къуажэхэми икIи абыхэм я курыт еджапIэхэми щрагъэкIуэкIащ Хэкум и ЛIыхъужьхэм я махуэм ехьэлIа Iуэхугъуэхэр, «Псалъэмакъ щхьэпэхэр». 
Зытхыжар
ХЬЭЩЫКЪУЕЙ  Олегщ.