«Пэрытхэм я зэщIэхъееныгъэм» и Бахъ­сэн щIыналъэ къудамэм и жэрдэмкIэ зэзауэ зыхэт спорт лIэужьыгъуэхэмкIэ зыгъэсэныгъэ зэIуха Бахъсэн къалэм и «Платинум» фитнес-клубым щекIуэ­кIащ.

ЗэщIэхъееныгъэм хэтхэм, Къэбэрдей-Балъкъэр мэкъумэш колледжым и студентхэм, къалэм дэт курыт еджапIэхэм щеджэхэм, спортым дихьэххэм яIущIащ УФ-м грэпплингымкIэ плIэнейрэ, дуней псом джиу-джитсумкIэ тIэунейрэ я чемпион, грэпплингымкIэ дунейпсо зэхьэзэхуэм щытекIуа, ММА-мкIэ АСА-мрэ АСБ-мрэ я чемпион, АСА-м и Гран-прим и финалист, спортсмен цIэрыIуэ Багъ Алий. 
ХьэщIэр къызэхуэсахэм ядэгуэшащ зы­хэт спортым и щэхухэмкIэ, жэрдэм зы­щIахэм щхьэхуэу ядэлэжьащ, иужькIэ псоми я упщIэхэм жэуап яритыжащ. 
«Сэ къызолъытэ щIэблэм нэхъыбэрэ дахуэзэн, ди щIэныгъэхэмкIэ, зэфIэкI­хэмкIэ дадэгуэшэн хуейуэ», - жиIащ Багъ Алий.
Спортсмен цIэрыIуэм и гъусэу зэIущIэм хэтащ «ACA YOUNG EAGLES» лигэм и зэ­уакIуэ Къаскъул Аслъэн. 
«Пэрытхэм я зэщIэхъееныгъэм» и Бахъ­сэн щIыналъэ къудамэм къыбгъэдэкIыу хьэ­щIэм фIыщIэ тхылъ иратащ, къытщIэхъуэ щIэблэм жыджэру зрадэлажьэм пап­щIэ. 
ИужькIэ псоми зэгъусэу сурэт зытрагъэхащ.
ТОМЭКЪУЭ  Алыдж.