Унагъуэм и илъэсым иращIэкI Iуэхухэм ящыщ зыуэ, Щэнхабзэ зыужьыныгъэмкIэ центрым щекIуэкIащ «РОДом из КБР» фестивалым хыхьэ «Живые семейные портреты» зэхыхьэр.
Унагъуэм и хабзэхэмрэ лъапIэныгъэхэмрэ, Хэкум и тхыдэр, жьымрэ щIэмрэ я зэпыщIэныгъэхэр хъумэным теухуа фестивалыр егъэзащIэ «Проект «Семья» АНО-м, КъБР-м Лъэпкъ Iуэхухэмрэ жылагъуэ проектхэмкIэ, Егъэджэныгъэмрэ щIэныгъэмкIэ и министерствэхэр и дэIэпыкъуэгъуу.
Мыбдеж щагъэлъэпIащ эссе зи Iэдакъэ къыщIэкIахэм я зэпеуэм щытекIуахэр. Iуэхум хэтащ республикэм и районхэмрэ къалэхэмрэ ящыщу илъэс 11 - 17 ныбжьым ит еджакIуэ 500-м щIигъу. Ахэр едэIуащ лъэпкъ жыгхэм, тхыдэм теухуа дерсхэм. Апхуэдэ эссем елIэлIахэм я тхыгъэхэр хагъэхьащ ахэр щызэхуэхьэса электрон къыдэкIыгъуэм. Зэхьэзэхуэм ирагъэхьа лэжьыгъэ 244-м нэхъыфIхэр къыхахащ.
Мы Iуэхур къызэзыгъэпэщахэр республикэм и курыт еджапIэхэмрэ интернатхэмрэ щыIащ, ныбжьыщIэхэр я Iуэхум, я лъэпкъ жыгыр зэрагъэхьэзырынум, лэжьыгъэр зэратхынум хагъэгъуазэу. НыбжьыщIэхэм ятхыжащ я адэ-анэхэмрэ адэшхуэ-анэшхуэхэмрэ, дэлъху, къуэш, шыпхъу нэхъыжьхэм къыжраIахэр. Апхуэдэ лэжьыгъэм и фIыщIэщ еджакIуэхэм я унагъуэ хабзэхэр, я лъэпкъ тхыдэм щыщ гуэрхэр къызэращIар. «Унагъуэр хабзэ, мамырыгъэ, зэгурыIуэ зэрылъ, зыр адрейм щыдэIэпыкъу быдапIэщ», - а гупсысэр нэхъыщхьэу къыхахауэ жыпIэ хъунущ мы зэпеуэм.
Фестивалым хыхьэу къызэрагъэпэщащ уэрэд жыIэнымкIэ, IэщIагъэ къыхэхынымкIэ «Моё имя - моя идентичность: путешествие по истории рода», «Арт-генеалогия: визуализируй свои корни», «Нити связи: практические советы для родителей подростков или доброжелательный подход», «Сердце к сердцу: искусство общения с детьми через историю рода» мастер-классхэр. Апхуэдэу гупхэм я унагъуэм щыщхэр, къэпщытакIуэр я дэIэпыкъуэгъуу, лъэпкъ жыгхэр ящIащ. КъинэмыщIауэ, еджакIуэхэр викторинэхэмрэ насыпырыхь джэгухэмрэ хэтащ, къызэгъэпэщакIуэхэмрэ фестивалым мылъкукIэ зыкъыщIэзыгъэкъуахэмрэ къабгъэдэкI саугъэтхэр къратащ. Iуэхум республикэм и артист нэхъыфIхэр ирагъэблэгъащ икIи ныбжьыщIэхэм Iэмал яIащ я упщIэхэмкIэ абыхэм зыхуагъэзэну.
- Iуэхур къызэдгъэпэщынымкIэ дэIэпыкъуэгъу къытхуэхъуахэм, лэжьыгъэ гъэщIэгъуэнхэр я бынхэм ятхыным тезыгъэгушхуа адэ-анэхэм, езы еджакIуэхэм фIыщIэ яхузощI, - жиIащ «Проект «Семья» АНО-м и унафэщI, хьэрычэтыщIэ, псапащIэ, IVS IуэхущIапIэм и унафэщI Нэхущ Азэмэт. - Дэтхэнэ зы цIыхуми ищIапхъэщ и лъэпкъымрэ и нэхъыжьхэмрэ я къекIуэкIыкIар. Нэхъ пасэм унагъуэм иIа пщIэр, илъа зэхущытыкIэ дахэр, щызекIуэу щыта хабзэхэр къэдгъэщIэрэщIэжынырщ нэхъыщхьэу зи ужь дитыр. Къалэну зыхуэдгъэувыжыр лъагъуныгъэр, дзыхьыр зи лъабжьэ унагъуэ дахэхэм я бжыгъэм хэдгъэхъуэнырщ, адэ-анэхэмрэ я бынхэмрэ я зэхущытыкIэхэр нэхъри дгъэбыдэнырщ, едгъэфIэкIуэнырщ. Дызыпэрыт Iуэхур зэманым зэрыпэджэжым гу лъатащ. Абы цIыху куэд зэрызэщIишэр гуапэщ. КъыдэхъулIэмэ, ар къыддаIыгъмэ, дяпэкIи абы къыпытщэну ди мурадщ.
ТЕКIУЖЬ Заретэ.
