Белгилисича, жюзюмчюлюк агропромышленный  комплексни къыйматлы бёлюмюне саналады. Ол себепден аны айнытыугъа  къыралдан  танг кесек болушлукъ тапдырылады.  
КъМР-ни Эл мюлк министерствосундан билдиргенлерича, бюгюнлюкде республикада жюзюмчюлюкге бёлюннген жерле бир минг гектардан аслам боладыла. Аны бла бирге жаз башында Прохладна районда „Виноград“ предприятияны жерлеринде энтта да 600 гектардан асламда орнатыллыкъдыла. Эсге сала айтсакъ, ол мында бахчаладан эки кереге кёпдю. 
Жюзюмчюлюк бёлюмню айнытыуну баш магъанасы республикада эски бахчаланы жангыртыргъады, аланы орунларына терк айныгъан терекле салыргъады эм кёбейтиргеди. Сёз ючюн, 1980 жыллада жюзюм регионда 4,6 минг гектарда ёсгенди.  Аны бла асламысында Прохладна бла Терк районлада кюрешгендиле. Болсада 1985-2000 жыллада мюлклени иги кесеги ишлерин тохтатхандыла. Ол санда къыралда  аты айтылгъан  «Прохладненский» винсовхоз да. 
Бусагъатда Терк, Прохладна, Май, Урван районлада  жюзюмню  орта эм гитче предпринимательле ёсдюредиле: эл мюлк организациялада  – 522,  элли фермер мюлкледе – 500 эм энчи иеледе да  40 гектарда ёседиле жюзюмле.   Аладан 99 проценти тирлик бередиле. Алай бла бюгюнлюкде окъуна 20 минг тонна чакълы жыйылады.
Мюлклени кёбюсюнде тыш къыралдан келтирилген, бай тирлик берген эм чагъыргъа жарагъан сортла  ёсдюрюледиле. Тирликни жартысын республикада жарашдырадыла, къалгъаны да тышына сатылады.

Курданланы Сулейман хазырлагъанды.