Черек районда быйыл тамамланнган жумушланы эсеплейдиле. Анга жораланнган жыйылыуда Бызынгы элни администрациясыны башчысы Чочайланы Зуфар айтханнга кёре, жыл башланнганлы социал магъаналы беш жумуш тамамланнганын билдиргенди.
Ол санда жюз метр чакълы бирде таза суу баргъан быргъы тартылгъанды. Орамла кече жарыкъ болурча жумуш да жюз процентге толтурулгъанды. Чыракъланы барысын да токну аз къоратханлагъа алышхандыла. Аны бла бирге къошакъ халда 150 чыракъ салыннганды, 5,5 километр чакълы бирде изоляциясы болгъан ток чыбыкъ (СИП) тартылгъанды эм он чыпын алышыннганды.
Элни къабырлары болгъан жер да игилендирилгенди. Ол санда аны жерин тюзетип, ташдан тазалап, бир гектар тенгли бирге кенгертирге онг табылгъанды. Дагъыда 8 километр тенгли бирде жайлыкълагъа бла биченликлеге баргъан жоллагъа да къаралгъанды.
Андан сора да, Молодёжная, Комсомольская эм Заречная орамлада асфальт салынырдан алгъа мурдорларын кючлегендиле, жауун суу саркъырча, бахчаланы сугъарырча 100 метрде быргъыла эм арыкъла салгъандыла.
Адамланы ичер суу бла сылтаусуз этиу районну баш борчларындан бири болгъанлай къалады. Аны бла байламлы Молла улу эм Носту улу орамлада арбазлагъа ичер суу келирча, суу жыйылгъан жерни жангыртханларына эм быргъыла да тартылгъанларына Огъары Жемталаны администрациясыны башчысы Занкишиланы Мариям Черек районну администрациясыны башчысы Къулбайланы Аланнга элчилерини атындан ыразылыгъын билдиргенди.
- Сагъынылгъан жумушланы хайырындан таза суу жетерча келеди эм игилиги уа ол тазалыгъы бла мардалагъа келишеди. Анга «Водоканал-анализ» учрежденияны эсеплери да артыкъ кере шагъатлыкъ этедиле, – деп къошханды Мариям.
Герпегежни администрациясыны башчысы Уяналаны Хамит айтханнга кёре, быйыл элде белгилерча талай жумуш этилгенди. Ол санда ырхы келгенден сора суу баргъан быргъыны 300 метр тенгли бири жангыртылгъанды. Ишле эки кюнню ичинде тамамланнганларын да энчи чертирчады.
Аны бла бирге Байсолтан улу, Къулий улу эм Мечи улу орамлада, саулай алып айтханда, 280 метр тенгли бирде жауун саркъырча бетон арыкъла бла быргъыла жарашдырылгъандыла. Элни кёбюсюнде орамла кече жарыкъ болурча мадар этилгенди. Жамауатны тилеги бла къабырлада аберилени сакъларча отоу ишленнгенди. Бу ишге элни имамы эм депутатлары да иги болушхандыла.
Андан сора да, Холам эм Мечи улу орамланы ырхыланы кезиуюнде жыйылгъан ташдан, топуракъдан тазалап, кенгертирге онг табылгъанды. Энди ала машиналагъа, жаяу жюрюгенлеге да тап болгъандыла.
Магометланы Сулейман.
