Республикада тамата классланы окъуучуларыны араларында «Бир тукъумдан чыкъгъан жигитле» деген ат бла конкурс бардырылгъанды. Анда хорлагъан сексен жаш бла къыз Минги тауну тийресинде «Эльбрус» къонакъ юйде юч кюн туруп, мастер-класслагъа, башха лекциялагъа да тынгылагъандыла, кеслерини проектлерин къоруулагъандыла, бир бирлери бла танышып, шуёхла да болгъандыла.
Артда ала сайлагъан усталыкъларына кёре къырал учрежденияланы, организацияланы башчылары бла тюбешгендиле: Саулукъ сакълау, Юстиция , Жарыкъландырыу эмда илму, Цифралы, Экономиканы айнытыу министерстволада, КъМР-ни прокуратурасында, УФАС-да, КъМР-ни Нальчикде гарнизон сюдде, «Ата журтну къоруулаучулары» къырал фондну республикалы бёлюмюнде, Мадина Саральпны чыгъармачылыкъ арасында да болгъандыла. Ахырында уа Къабарты-Малкъарны Башчысы Казбек Коков бла тюбешгендиле.
Ол жолоучулукъларыны кезиуюнде жаш адамла насийхатчылары бла тюбешгендиле эмда сайлагъан усталыкъларыны юслеринден кёп магъаналы зат эшитгендиле.
Казбек Коков бла сабийле ашыгъып сакълагъан тюбешиу Гинжи театрда ётгенди. Аны кезиуюнде жашла бла къызла республиканы Башчысына соруула бергендиле эмда аны бла бирге суратха да тюшгендиле.
Конкурсха Хасанияны 16-чы номерли орта школуну 9-чу классыны окъуучусу Холаланы Далхат да къатышханды. Анда аны проекти хорлагъанды. Ол Минги тауну тийресинде бардырылгъан форумда да болгъанды, республиканы саулукъ сакълау министри Рустам Калибатов бла тюбешгенди, анга да бир къауум соруу бергенди. Далхат психолог болургъа мурат этеди.
Люба Адилова.
