Спорт лIэужьыгъуэ куэдкIэ зэхьэзэхуэ щебгъэкIуэкI хъуну  Щхьэлыкъуэ къуажэм щаухуэ спорт унэмрэ абы щащI топджэгу губгъуэмрэ ехьэлIа лэжьыгъэхэр и кIэм нэблэгъащ.

Иджыпсту унэлъэгухэр кърагъэжыкI, жьыихупIэхэр хуащI, сантехникэ, электротехникэ лэжьыгъэхэр щрагъэкIуэкI. Апхуэдэуи пэш кIуэцIхэмрэ унэ блынджабэхэмрэ къращIыкI. Баскетболрэ волейболрэ ущыджэгу хъуну щIыпIэхэр зыхуей хуагъэзакIэщ, топджэгу губгъуэри хьэзыр хъуащ, къэнэжар къэухьхэр ихъуреягъкIэ къегъэувэкIыжынырщ.

         Ухуэныгъэм и проектым къызэрыхэщымкIэ, спорткомплексыр къатитIу зэтету щытынущ, псори зэхэту метр зэбгъузэнатIэ 1200-м щIигъу хъууэ. Абы хэтынущ универсальнэ спорт залыр, тренажерхэр зыщIэтыну, теннисым щхьэкIэ залхэр, медицинэм и лэжьакIуэхэм, тренерхэм я пэшхэр, зытIэщIыпIэхэр, зыгъэпскIыпIэхэр. КъекIуэлIэнухэр бэнэкIэ спорт лIэужьыгъуэхэмрэ боксымрэ щыхуагъэсэн папщIэ зыхуэныкъуэну псомкIи ар къызэрагъэпэщынущ.

Лэжьыгъэхэр ирагъэкIуэкI «Къуажэхэм сыт и лъэныкъуэкIи зегъэужьын» къэрал программэм ипкъ иткIэ икIи ахэр зэфIагъэкIыну я мурадщ дызэрыт илъэсым и кIэм ирихьэлIэу.

                                                                  ХЬЭЩЫКЪУЕЙ Олег.