Кёп болмай Къабарты-Малкъар къырал университет бла «Радий» илму производство предприятие эм Агропромышленный комплекс бла байламлы продукцияны къоркъуусузлугъу  бла  качествосун тинтген федерал араны (ЦОК АПК) бёлюмю   бирге илму-сынам   консорциум къураргъа келишгендиле.

Анга КъМКъУ-ну ректоруну къуллугъун толтургъан Юрий Альтудов, «Радий» биригиуню таматасы Магомет Конов эм ЦОК АПК-ни республикада бёлюмюню таматасы Хаути Сохроков къатышхандыла.

Консорциумну чеклеринде агротехнология, инновация полимерле, эл мюлк эм башха къыйматлы бёлюмле бла байламлы илму-излем, инновация, билим бериу проектле бардырыллыкъдыла.

Юрий Альтудов айтханнга кёре, къыйматлы технологияла жарашдырыу бютюнда эл мюлк производствода республиканы Агропромышленный комплексине болмагъанча магъаналыды. 

- Биз эл мюлк производство жаны бла аслам продукция чыгъаргъан регионладан бирине саналабыз, ол саулай къыралда орта кёрюмдюден эки кереге кёпдю. Болсада мындан арысында да аны жангы технологияланы себеплиги бла ёсдюрюрге онг табыллыгъына бек ышанабыз.  Жангы къуралгъан консорциум инновация технологияла бла жалчытырча ахшы къошумчулукъ этерикди.  Байламлыкъда бардырырча къыйматлы проектле кёпдюле. Алагъа университет да къатышаллыгъы уа бютюн асыуду.   Студентлерибиз бийик    технологияланы эм оборудованияланы хайыры бла сынамларын кючлерге онг табарыкъдыла.  Саулай алып айтханда, быллай башламчылыкъ регионну айнытыугъа да себеплик этерикди, ‒ дегенди Юрий Альтудов.

Хаути Сохроков да, айтылгъан сёзлеге къошула, консорциум региондан тышында, саулай къыралны айныууна да жарарыгъын белгилегенди. 

Ызы бла Магомет Конов Къабарты-Малкъарда юч уллу организацияны бирлешгени илму жаны бла жетишимле болдурууда уллу атламгъа санагъанды.  

Келишимге кёре, консорциум беш жылгъа къуралгъанды.

Эсге сала айтсакъ, "НПП "РАДИЙ" биригиу   радиолокация, радионавигация аппаратура эм радиоаппаратура чыгъарыу бла кюрешеди. 

Бизни корр