Стратегиялы айныу эмда миллет проектле жаны бла советни бу кюнледе бардырылгъан жыйылыуунда РФ-ни Президенти Владимир Путин 2019-2024 жыллада миллет проектлени толтурууну эсеплерин чыгъаргъанды эмда 2025-2030 жыллагъа жарашдырылгъан 19 жангы проектни жашауда бардырыу жаны бла буйрукъла бергенди. Аны юсюнден КъМР-ни Башчысы Казбек Коков кесини телеграм-каналында жазгъанды.
«Белгиленнгенича, къыралыбызда экономика эмда социал жаны бла да бир заманда да болмагъанча уллу иш этилгенди. Ол а регионланы айныуларына да жангы кюч бергенди, ишсизлени санын азайтыугъа, илмуну къыйматын кётюрюуге, кеси производствобузну къураугъа, импортну алышындырыугъа да уллу себеплик этгенди.
Къабарты-Малкъарда беш жылны ичинде саулукъ сакълау, билим бериу, маданият эмда спорт бла байламлы жюзле бла мекямла ишленнгендиле эмда жангыртылгъандыла.
Халкъны къырал жумушла бла жалчытыу да игиленнгенди. Анга уа бёлюмлени цифра амаллагъа кёчюулери, жамауат бла байламлыкъны кючлендириу да себеплик этгендиле. Гитче эмда орта предпринимательлик бла кюрешгенле къыралдан иги кесек болушлукъ алгъандыла. Ол а эл мюлкде, промышленностьда, халкъны жумушларын жалчытыуда, розница сатыу-алыуда, туризмде да ишни тирилтирге онг бергенди.
Озгъан жыллада башланнган битеу ишле да мындан ары да бютюн кюч ала барлыкъдыла. Къыралны Башчысы регионланы жангы миллет проектлеге тири къатышыуларын бек магъаналыгъа санагъанды. Суу бла жалчытыу, сабийли юйюрлеге къайгъырыу, къагъанакъла кёп тууарча этиу, элледе ырахат жашау къурау, уллайгъанлагъа эмда ёсюп келген тёлюге не жаны бла да тутхучлулукъ этиу – ала барысы да келир заманны баш магъаналы борчларыдыла.
Россейде арт беш жылда къаллай бир иш этилгенине къарасакъ, ёхтемленмей къалмайса, жангы миллет проектлени бла муратланы деменгилиликлери да тамашагъа къалдырады.
Президентибизни башламчылыкълары, алгъынча, адамларыбызны жашау къолайлыкъларын игилендириуге бурулупдула – хар нени да «адам ючюн» деген магъанада. Ала къалай толтуруллукъларына багъа бере туруб а халкъны оюму эсге алынырыкъды, социал болумгъа къараллыкъды. Жамауатыбызгъа социал проектлени юслеринден хапар билдирип турууну магъанасы да уллу болгъаны эсгертилгенди.
Къабарты-Малкъар миллет проектлени толтуруу жаны бла къыралны алчы регионларыны санына киреди. Жангы миллет проектлени жашауда бардырыуда да, сёзсюз, биз ол алчылыкъны сакъларыкъбыз, миллет Башчыбыз салгъан борчланы толтурур ючюн къолубуздан келгенни аярыкъ тюйюлбюз»,- деп жазгъанды Казбек Коков телеграм-каналында.
