КъМР-ни Башчысы Казбек Коков бу кюнледе бардыргъан кенгешде сёз Нальчикде жолланы юслеринден баргъанды. Ол санда республиканы ара шахарында 2028 жылгъа дери тамамланыллыкъ ишлени планы сюзюлгенди. Жыйылыугъа КъМР-ни транспорт эмда жол мюлк министри Аслан Дышков бла шахар округну администрациясыны башчысы Таймураз Ахохов къатышхандыла.
Белгиленнгенича, жолчула Ногмов, Кешоков, Щорс эмда Каменская магистраль орамлада тынгылы ремонт ишлени башлагъандыла. Алада суу ызла да алышдырыллыкъдыла, дагъыда жангы бордюрла салынырыкъдыла, жауун суула агъарча этилликди, жаяу жолчукъла ишленирикдиле, машиналагъа майданчыкъла къураллыкъдыла. Кече жарыкъ болуруна да эс бурулмай къаллыкъ тюйюлдю.
Каменская орамны машинала ётген кесеги тёрт ызгъа дери кенгертилликди. Анда къоркъуусузлукъну битеу мадарлары да этилликдиле. Ол санда «Таза кёк» программагъа кёре хауада ток чыбыкъла барысы да жер тюбюне кёчюрюллюкдюле, жаяу жолчукъла ишленирикдиле, светофорла, видеокамерала, чыракъла да салынырыкъдыла. Аны бла бирге инженер коммуникацияла жангыртыллыкъдыла. Битеу ишлени 2025 жылны кюз артына бошаргъа белгиленеди.
Келир жылны планларына дагъыда бир ненча орамда тынгылы ремонт этиу киреди. Ол санда Руставели, Мазлоев, Байсултанов, Карашаев орамла жангыртыллыкъдыла. Ахыр экиси уа 4 ызгъа дери кенгертилликдиле.
Андан сора да, къурулушлары бошала тургъан уллу социал мекямланы тийрелери игилендирилликдиле, шахарны тёгереги бла автомобиль жол ишлеу, Нальчик сууну жагъасын тапландырыу бла байламлы проектни жарашдырыу иш андан ары бардырыллыкъды.
Бюгюнлюкде Идаров орамны 5,2 километринде ремонт ишле бара турадыла. Казбек Коков ол федерал жолну тийрелерин да тап халгъа келтирирге, ол санда «Таза кёк» программагъа кёре кече жарыкъ болурча этерге, жаяу жолчукъла ишлерге эмда тёгерек-башны жашиллендирирге буюргъанды, деп билдиргендиле КъМР-ни Башчысыны бла Правительствосуну пресс-службасындан.
