КъМР-ни Жамауат Палатасыны пленар кенгешинде бизни республикада кёп фатарлы юйлеге тынгылы ремонт этиу программаны юсюнден сёлешиннгенди. Жыйылыугъа бу ишни тамамлау жаны бла регион операторну башчысы Артур Шогенов, инфраструктура эмда цифралы айнытыу министрни орунбасары Жамболат Гасташев, районланы бла шахар округланы жер-жерли администрацияларыны эмда талай ведомстволаны келечилери къатышхандыла.
Палатаны экономиканы айнытыу, предпринимательствогъа себеплик этиу эмда жашау журт-коммунал политика жаны бла комиссиясыны башчысы Владимир Павленко бу программа къалай бардырылгъаны бла шагъырейлендиргенди, кемчиликлени да туура этгенди. Ол айтханыча, буруннгу жыл тийишли ишлеге кёп къалмай - 112, былтыр а – 125,2 миллион сом къоратылгъанды. Аны хайырындан битеу да 80 юйге ремонт этилгенди. Быйыл а, ал тергеулеге кёре, 221,8 миллион сом жыйыллыкъды, анга да аллай бир юйде мадар этилликди.
Программа бардырылып башланнган кюнден бери аны баш чуруму – адамладан тёлеулени жыйыуду. Сёз ючюн, биринчи жыл пландан жаланда беш-алты проценти толтурулгъанды. Ангылатыу иш тири бардырылгъаны, регион оператор да къаты болгъаны себепли буруннгу жылда тёлеулени ючден бири жыйылгъанды, былтыр – 42, быйыл биринчи жети айны ичинде уа – кёп къалмай 55 проценти. Бу жаны бла Май, Чегем эм Прохладна районлада, сора Нальчик бла Прохладный шахар округлада тирирек болгъанларын белгилегенди Владимир Павленко. Бахсан бла Элбрус районда эмда Бахсан шахар округда уа тёлеулени жыйыу бек осалды, деп чертгенди ол.
Болумну тюрлендирир умутда регион оператор даулау ишни тохтаусуз бардырады. Аны чеклеринде фатарланы иелерине 187 минг эсгертиу жиберилгенди, сюдлеге уа 252 миллион сом багъасына 20 мингден артыкъ заявление берилгенди. Алты мингден артыкъ адам борчларын кезиу-кезиу жабарча аны бла келишим этгендиле. Аны хайырындан да 73,5 миллион сом жыйыллыкъды.
Кёп фатарлы юйлеге тынгылы ремонт этиу программаны болжалы 2014-2043 жылла бла чекленеди. Бюгюнлюкде анга 2228 юй киреди. Ол неда бу кезиуде аладан къайсыларын жангыртыргъа кереклисини оноуу къалай этилгенини, анга неллай бир къоратылгъаныны, ишни тамамлагъанланы эмда алагъа кёз-къулакъ болгъанланы юсюнден регион операторну башчысы Артур Шогенов билдиргенди. Ахча заманында, кеси да толусунлай жыйылмагъаныны хатасындан сагъынылгъан программада къысха болжаллы подпрограммала къураргъа тюшгенин да айтханды.
Аны ючюн ишле да ахча келгеннге кёре бардырыладыла. «Сёз ючюн, программа бла 2020 жылда 700 миллион сом жыйылыргъа керек эди, алай биз а жаланда 210-220 миллион сом келирин сакълайбыз. Аны ючюн муниципалитетле бла келишип, бир талай объектни жангыртыуну артха къояргъа тюшерикди», - деп белгилегенди ол.
Артур Шогенов подряд организацияланы ишлерине контрольну юсюнден къысха айтханды, Жамауат палатаны келечилерини бу жаны бла къатыракъ болургъа керекди деген эсгертиулерине да къулакъ салгъанды.
Жамболат Гасташев а, программа бардырылып башланнганлы бери тёлеуню ёлчеми бир да кётюрюлмегенин эсге салып, энди аны эм азындан инфляцияны ёсюуюне кёре тюрлендирип башларгъа оноу этилгенин, КъМР-ни Инфраструктура эмда цифралы айнытыу министерствосунда тийишли иш бардырыла тургъанын билдиргенди. Министрни орунбасары республикада жашау журт фондну тийишдириуню, къоранчланы азайтыргъа кереклисини, этилген ишле ючюн жууаплылыкъны кючлендириуню юсюнден да сёлешгенди.
Кенгешни ахырында КъМР-ни автомобиль транспортда эмда жол мюлкде уруннганланы профсоюзуну башчысы Анна Головатенко палатаны къауум келечисин ведомстволу грамотала эмда ыразылыкъ къагъытла бла саугъалагъанды.
