«Санатории-России.рф» интернет-порталым къызэритамкIэ, ди республикэм и санаторхэмрэ курортхэмрэ зыщызыгъэпсэхуну, я узыншагъэм щыкIэлъагъэплъыну мы гъэмахуэм къэкIуахэм я куэдагъымрэ абыхэм хэхъуэу къыдатамрэ хэпщIыкIыу нэхъыбэщ адрей илъэсхэм елъытауэ икIи абыкIэ Кавказ Ищхъэрэм и щIыналъэхэм я нэхъыфIищым дыхыхьащ.
Гъэмахуэм Къэбэрдей-Балъкъэрым зыщагъэпсэхуащ цIыху мин 13,6-м, зы путёвкэм ику иту сом мин 15 щIатащ. А пIалъэм къриубыдэу санаторэхэмрэ курортхэмрэ псоми зэхэту сом мелуан 204-рэ фейдэуэ яIащ икIи нэгъабэ и апхуэдэ пIалъэм щыIа бжыгъэхэм нэхърэ процент 16-кIэ нэхъыбэщ ар.
Дызэрыт илъэсым зэрыщIидзэрэ Налшык къалэм и санаторэхэмрэ курортхэмрэ цIыху мин 40-м щIигъум зыщагъэпсэхуащ, ари процент 18-кIэ нэхъыбэщ 2023 гъэм и апхуэдэ пIалъэм щыIа бжыгъэхэм елъытауэ.
Ди щIыналъэм иджыпсту щолажьэ цIыхухэм и узыншагъэм щыкIэлъыплъ, зыщагъэпсэху хъун IуэхущIапIэу 20-м нэс икIи абыхэм я Iуэхутхьэбзэхэм я уасэхэр туристхэм я дежкIэ илъэс къэскIэ нэхъ езэгъырабгъу хъуурэ макIуэ. Абы нэмыщI, щIыпIэ инфраструктурэр иджырей зэманым къезэгъыу зэрырагъэфIакIуэм, гъуэгущIэхэр зэраукъуэдийм, ди щIыналъэм укъэкIуэну нэхъ тынш зэрыхъуам, нэгъуэщIхэми я фIыгъэкIэ, ди деж зыщызыгъэпсэхуну къакIуэхэм я бжыгъэм къыхэхъуэ зэпытщ. Гугъэ щыIэщ ди санаторэхэмрэ курортхэмрэ я Iуэхутхьэбзэхэм арэзы ищIхэр дяпэкIи нэхъыбэж хъуну, абы кърикIуэуи ди турист IэнатIэм зиужьыну, республикэм хэхъуэ къыхуихьыну.
Къэбгъэлъагъуэмэ, Кавказ Ищхъэрэм и санаторэхэм псори зэхэту цIыху мин 269-м зыщагъэпсэхуащ гъэмахуэ блэкIам, путевкэхэм трагъэкIуэдащ ику иту сом мин 45-рэ. КИФЩI-м и санаторэхэмрэ курортхэмрэ зэхэту сом мелард 12,1-рэ хэхъуэу къатащ, ар процент 14-кIэ нэхъыбэщ нэгъабэ щыIа бжыгъэхэм елъытауэ. Апхуэдэуи а пIалъэм къриубыдэу къэралым и санаторэхэмрэ курортхэмрэ псори зэхэту цIыху мелуани 2-рэ мин 225-м зыщагъэпсэхуащ.
ХЬЭЩЫКЪУЕЙ Олег.
