Бахъсэн куейм хиубыдэ Зеикъуэ къуажэм футбол цIыкIумкIэ зэхьэзэхуэ щызэхэтащ иджыблагъэ. Ар фэеплъ хуащIащ я къуажэгъу, зи дзэ къалэныр хахуэу зэригъэзэщIам папщIэ «За боевые заслуги» медалыр зыхуагъэфэща Къып Беслъэн. Зэпеуэм и жэрдэмщIакIуэ хъуахэщ и классэгъуу щытахэр, ныбжьэгъухэр, благъэхэмрэ Iыхьлыхэмрэ. КъызэгъэпэщакIуэхэм щIэгъэкъуэн яхуэхъуащ Бахъсэн район администрацэмрэ «Хэкум и хъумакIуэхэр» Къэбэрдей-Балъкъэр фондым и къудамэмрэ.

Зи псэр Хэкум и сэбэп зыхэлъхэм щIэзыта сэлэт хахуэр ягу къагъэкIыжу, къэзылъхуахэмрэ зыгъэсахэмрэ фIыщIэ хуащIу къэпсэлъащ кърихьэлIа хьэщIэхэр, езыгъэджахэр, къуажэдэс нэхъыжьхэр къыщыпсэлъащ. 
Зэхьэзэхуэр щызэхэтар езы Къып Беслъэн щеджа, Шафий Хьэчим и цIэр зезыхьэ 2-нэ курыт школырщ. Ар къиуха иужь щIалэр УФ-м ЮстицэмкIэ и министерствэм экономикэмрэ правэмрэ щыхурагъаджэу Рязань щиIэ институтым щIэтIысхьат. ЩIэныгъэ нэхъыщхьэ зригъэгъуэта иужь дзэм къулыкъу щищIащ. А къалэныр игъэзащIэри, Беслъэн лэжьапIэ IэнатIэхэр зыхъумэ IуэхущIапIэм щылэжьащ.
Дзэ къалэн хэха зыхуагъэувахэм ар яхыхьащ 2023 гъэм икIи хахуэу зэрызэуам, и Хэкум хуиIа лъагъуныгъэм и кууагъым и щыхьэтщ къыхуагъэфэща медалыр.

Къыпхэ я щIалэр зыцIыхуу щыта псоми зэрыжаIэжымкIэ, Беслъэн нэмысыфIэу, хабзэ хэлъу, нэфIэгуфIэу, губзыгъэу, жумарту, гуапэу дунейм тетащ. МащIэ къигъэщIами, лъэужь дахэ къэзыгъэна щIалэм и цIэр зэрыуахътыншэнум, щIэблэм щапхъэ зэрахуэхъунум зыцIыхуахэм шэч къытрахьэркъым.

ШАФИЙ Аслъэн.