30 сентября, 2019 - 07:15
Парламентни алтынчы чакъырылыууну президиумуну биринчи жыйылыуунда депутатла 30 сорууну сюзгендиле. Аны спикер Татьяна Егорова бардыргъанды.
3 октябрьде законла чыгъарыучу баш органны кенгешин Правительствону юйюнде бардырыргъа оноу этилгенди. Анда «Къабарты-Малкъар Республиканы Башчысын КъМР-ни Парламентини депутатлары айыргъанларыны юсюнден» соруу сюзюллюкдю. 10 октябрьде уа кезиулю пленар жыйылыу чакъырыллыкъды. Анда депутатла законланы сюзериклери белгиленеди.
Кенгешде «КъМР-ни Парламентини комитетлерини юсюнден Болум» тинтилгенди. Контроль эм регламент жаны бла комитетни башчысыны орунбасары Мурадин Карданов документ комитетлени ишлерин бир низамгъа келтиргенин чертгенди. Жаланда Миллетлени ишлери жаны бла комитет анга кирмейди. Депутатла федерал законланы проектлерине да къарагъандыла. Алада сёз РФ-ни Бюджет, Налог кодекслерини, борчлу халда медицина страхованияны, конкуренцияны жалчытыуну юслеринден барады. Башха субъектледе коллегаларыны башламчылыкъларын да тинтгендиле. Алада РФ-ни Жер кодексине тюзетиуле, юй жаныуарланы иелерини жууаплылыкъларыны юслеринден барады сёз. КъМР-ни законла чыгъарыучу баш органыны 2019 жылда кюз арты сессиясыны планыны проекти да сюзюлгенди.
Ахырында Татьяна Егорова КъМР-ни Парламентинде Жамауат советни жангы къаууму къуралып башлагъанын билдиргенди. Ол профильли комитетлеге Контроль эм регламент жаны бла комитетге анга кандидатланы кёргюзтюрге чакъыргъанды.
Жамауат совет граждан обществону институтлары бла байламлыкъланы жюрютюр, контрольну тамамлар мурат бла къуралгъаны белгиленнгенди. Аны къауумуна кандидатланы спикер, аны орунбасарлары эмда комитетле кёргюзтедиле (экишер адамны). Советге РФ-ни 18 жылдан тамата инсанлары кирирге боллукъдула – дайым да Къабарты-Малкъарда жашагъанла. Дагъыда жамауатда хурметлери жюрюрге, къырал власть органлада сынаулары болургъа, Парламентни ишини энчиликлерин билирге тийишлидиле.
КъМР-ни Парламентини пресс-службасы.