КъМР-ни Правительствосуну председателини орунбасары Залим Кашироковну башчылыгъында Къабарты- Малкъар Республиканы Чекчи комиссиясыны жыйылыуу болгъанды, ол регион правительствода къуралгъан эди.
Жыйылыугъа къатышханла къуралыулу соруулагъа къарагъандыла, ол санда комиссияны не мурат бла къуралгъанын эм аны борчларыны юсюнден да айтылгъанды. Анга кёре жууукъ заманда къаллай сорууланы тамамларгъа кереклиси эм ишчи план да белгиленнгенди.
Чеклени юсю бла байламлы ведомствола аралы комиссия КъМР-ни Правительствосуну бегимине тийишлиликде быйыл 15 октябрьде къуралгъанды. Аны къауумуна федерал органланы толтуруучу власть келечилери, чеклеге жууукъ орналгъан районланы администрацияларыны эм къырал власть органланы оноучулары киредиле.
Кенгешде белгиленнгенине кёре, Къабарты-Малкъар Республика тыш къырал бла чеклери болгъан регионнга саналады. Россей Федерацияны къырал чеги Гюржю Республика бла 120 километрден асламды эм Баш Кавказ тауланы юсю бла барады.
Башда сагъынылгъан комиссия Россей Федерацияны регионда чекле бла байламлы къырал политиканы бардырыу жаны бла жууаплы структураланы ишлеулерине къарайды. Аны баш борчу республиканы жеринде чеклеге жууукъ болгъан тийреледе къыралыбызны къоркъуусузлугъун жалчытыу жаны бла мадарланы къурау эм бузукълукъ чыгъаргъа боллукъ жерлени ачыкълауду. Дагъыда ведомствола аралы ишни бардырыргъа предложенияланы хазырлау эм комиссияны келечилерини араларында байламлыкъны жюрютюу, къырал чеклени сакълау жаны бла федерал законлагъа тюрлениуле кийирирге тюшсе, бизни республиканы тау жерлерини энчиликлерин белгилеп, предложенияла хазырларгъа эм инсанланы араларында кеси ыразылыкълары бла къырал чекни сакъларгъа сюйгенлеге тап онгла къараргъа себеплик этиудю. Аны юсюнден КъМР-ни Правительствосуну порталы билдиреди.
