Огъары Малкъарда 1942 жылны ноябрини ахыр кюнлеринде болгъан бушуулу ишледе жан бергенлени хурметлеу жумушла бардырылгъандыла. 

1 декабрьде ол узакъ кюнледе бир тюрлю терсликлери болмай къырылгъан мамыр адамланы эсгериу, Аллахуталадан ала ючюн тилек этиу тёреге айланнганды. Быйыл да Огъары Малкъарда Черек ауузунда бушуулу ишге жораланып салыннган эсгертмени къатында жамауат жыйылгъан эди. Огъары малкъарлыла бла бирге былайгъа Къашхатаудан, Бабугентден, Хасаниядан, Вольный Ауулдан, Кенжеден келгенле да болгъандыла. 

КъМР-ни Муслийманларыны дин управлениясыны башчысыны орунбасары, къадий Мисирланы Хызыр былайда къырылгъанланы гюняхлары кечилирин тилеп, дууа тутдургъанды. 
Эсигизге салайыкъ: 1942 жылда НКВД-ны аскерлери Шимал Кавказда бандит къауумланы жокъ этиу операция бардыргъандыла. Алай аланы хатасы мамыр адамлагъа жетгенди – Глашлары, Сауту, Огъары Малкъар, Огъары Чегет, Кюнлюм элледе атышыула бардырылгъандыла. 
«…юч кюнню ичинде эллилени бла мекямланы жокъ этгенбиз, … сауутлары бла складны чачдыргъанбыз…. 27 ноябрьден 30 ноябрьге дери беш эл жокъ этилгенди – Огъары Малкъар, Салты (Сауту), Огъары Чегет, Глашлары, Кюнлюм, аладан ючюсю кюйдюрюлгенди. 1500 адам ёлтюрюлгенди. Жесирле айтханларыча, аладан 90 бандитле, 400 (эр киши) сауутланы туталлыкъ, къалгъанлары тиширыула бла сабийле…» – деп жазгъанды НКВД-ны къауумуна башчылыкъ этген капитан Накин командованиягъа билдириуюнде. 
Сёзге, къуру Саутуда 310 мамыр адам, аладан жартысы 16 жылгъа дери сабийле болгъандыла. Аланы хурметлеуге аталгъан бушуулу митингни Сауту элни тукъумларыны совети Черек районну администрациясыны болушлугъу бла къурагъанды.  

Тикаланы Фатима
 хазырлагъанды.