СКФО-ну башха-башха бийик билим берген окъуу юйлеринден сексен аслам жаш бла къыз «ИЛМУ 0+» Битеуроссей фестивальны чеклеринде регион даражалы билим бериу интенсивге къатышхандыла. Тюбешиу Къабарты-Малкъар къырал университетни Минги тауну тийресиндеги окъуу-билим комплекс майданында озгъанды. 
КъМКъУ-ну Илму тинтиуле, жангычылыкъла эмда студент илму жамауат управлениясыны башламчылыгъына тийишлиликде, тюбешиуле жаш тёлюню илму-излем тинтиулеге сейирлерин къозгъар эмда ала эслерин бюгюнлюкде магъаналы боллукъ темалагъа бурур мурат бла бардырылгъандыла.
Юч кюнню ичинде Дагъыстанны къырал университетинден бла РАН-ны бу регионда илму-тинтиу арасындан, Волгоградны къырал медицина университетинден келгенле эмда къонакъбай окъуу юйню бла Къабарты-Малкъар къырал аграр университетни жаш алимлери лекциялагъа тынгылагъандыла. Андан тышында да, Россейни Билим бериу эмда илму министерствосуну, Жангычылыкълагъа тутхучлулукъ этген фондну башламчылыкълары бла бардырылгъан конкурслагъа ишлени къалай жазаргъа эмда заявкаланы къалай жарашдырыргъа тийишлисини юсюнден тренингле бла мастер-класслагъа къатышхандыла. Ол затлагъа тюшюндюргенлени арасында уа Санкт-Петербургну фтизиопульмонология институтуну илму-излем арасындан келген лекторла да болгъандыла. 

Трамланы Зухура.