Тюнене Къабарты-Малкъаргъа РФ-ни илму эмда бийик билим бериуюню министри Михаил Котюков келгенди. Кесини ишчи жолоучулугъуну кезиуюнде уа ол КъМКъУ-ну «Точка кипения» форматыны мурдорунда кенгеш бардыргъанды. Анга КъМР-ни Башчысыны къуллугъун болжаллы халда толтургъан Казбек Коков, республиканы илму учрежденияларыны, бийик окъуу юйлерини таматалары, ведомстволу министрле, илмуланы докторларыны, профессорларыны къаууму, бирсиле да къатышхандыла. Тюбешиуде сёз СКФО-да миллет билим бериу ара (НОЦ) ачыуну юсюнден баргъанды.
Жыйылгъанланы алларында сёлеше, Казбек Валерьевич эм алгъа Михаил Михайловичге бери келгенине ыразылыгъын билдиргенди эмда Къабарты-Малкъарны Шимал Кавказда сагъынылгъан араны (НОЦ) ачылыуунда сейири болгъанын белгилегенди. Анга къошулур ючюн регионну бу сферада тутхучлулугъу, мурдору да тийишли даражада болгъанын, аны къуралыуу СКФО-ну регионларында социал-экономика болумну игилендирирге себеплик этеригин айтханды.
Эсгерте кетейик, сагъынылгъан араны ачыу жаны бла башламчылыкъ РФ-ни Президентини май указын эмда «Илму» миллет проектни жашауда бардырыуну чеклериндеди. Алагъа тийишлиликде уа Россей 2024 жылда илму-технология ёсюуню ачыкълагъан, баямлагъан илму тинтиулени бардырыу эмда ол сферада разработкаланы айырмалы даражада хазырлау жаны бла дунияда эм айныгъан беш къыралны тизмесине кирирге керекди. Сагъынылгъан кезиуге дери къырал даражалы 15 илму-билим бериу араны ачаргъа, эндиге дери айныгъанлагъа саналып тургъанланы уа ырысхы-техника мурдорларын бютюн кючлендирирге белгиленеди.
Тюбешиуде КъМКъУ-ну ректору Юрий Альтудов, Бахсандагъы нейтринный обсерваторияны башчысы Валерий Кузьминов, Бийик-тау геофизика институтну таматасы Беккиланы Мухтар, Къарачай-Черкесде обсерваторияны директору Валерий Власюк, бирсиле да ала къаллай илму тинтиуле бардыргъанларыны, къайсы окъуу юйле неда арала бла байламлыкъ жюрютгенлерини, илмуда жангы эсеплерини эмда жетишимлерини юслеринден сёлешгендиле. Къонакъ Юрий Камбулатович университетни эм даражалы практикалы жетишимлерин эшитирге сюйюп, аланы юслеринден соргъанды. Ректор аллай бийикликлеге алимлерибизни, студентлерибизни бла аспирантларыбызны искусстволу интеллект, нейро эмда нанотехнологияла жаны бла ишлерин санагъанды.
Кенгешни кезиуюнде М.Котюков анда жаланда университетлени угъай, саулай да илму-билим араны къураргъа эмда айнытыргъа онг берлик мадарланы юсюнден айтыргъа кереклисин эсгертгенди. Окъуу юйлени, илму махкемелени тюрлю-тюрлю проектледе кеслерин сынаргъа чакъыргъанды. Аны бла бирге уа эм ахшы эсепни берлик темалагъа эс бурургъа тийишлисин, алай болса жаш тёлю да кеслерине усталыкъ сайлауда ызланы къыйналмай белгилериклерин ангылатханды.
Андан сора да, къонакъ жангыз фундаментальный илму кёрюмдюлени кётюрюу бла экономиканы айнытхан тынч болмазлыгъын чертип, ол кёрюмдюлени практика магъаналарыны даражасын айнытыргъа кереклисин белгилегенди. Аны ючюн а конкуренциягъа чыдамлы, жангы ишчи жерлени ачаргъа себеплик этерик, экономика эсеплени кётюрлюк къыйматлы проектлени жарашдырыргъа тийишлисин айтханды.
Билим бериу ара - ол илмуну, окъутууну эмда индустрияны бирлиги болгъанын толу ангыларгъа чакъыргъанды. Эндиги кенгешде аны айнытырыкъ амалланы, ызланы да бютюн тутхучлуларыны юсюнден эшитирге сюйгенин чертип, тюбешиуню къурагъанлагъа, анга къатышханлагъа да ыразылыгъын билдиргенди.
