Быйыл Къабарты-Малкъарда  "Круг добра" фондну себеплиги бла 49 сабийге 460 миллион сом багъасына  дарманла алыннгандыла.  
Ала аз тюбеген  эмда къыйын  ауруулары болгъанладыла. Алагъа багъар ючюн, иги кесек ахча керек болады. Сёз ючюн, бир-бир дарманланы упаковкасыны  багъасы 100 миллион сомгъа жетеди. Ол себепден саусуз сабийлери болгъанлагъа жандауурлукъ фонддан болушлукъ алгъандан башха амал къалмайды.     
Эсге сала айтсакъ, «Круг добра» фонд 2021 жылда Россейни Президентини башламчылыгъы бла  къуралгъанды.  Анга ахча жылгъа  5 миллион сом файда тюшюргенлеге салыннган налогдан  бёлюнеди.  Фонд ишлегенли  къыралда  беш минг сабийге болушлукъ берилгенди. 
Анга заявканы Къырал жумушланы  порталында неда жашагъан жерлеринде врач-педиатр берирге боллукъду. Аны бла бирге диагнозуну  эм керек дарманларыны юсюнден тынгылы хапар  билдирирге керекди.   Ызы бла ол КъМР-ни Саулукъ сакълау министерствосуна бериледи. Анда къарагъанларындан сора, тийишли къагъытла жарашдырып, фондха жибередиле.