КъБР-м и Iэтащхьэ КIуэкIуэ Казбек яхуэзащ «ЛIыхъужьхэм я щIэблэ» Iуэхум хэта ныбжьыщIэхэм. Абыхэм республикэ УнафэщIым зыкъыпащIауэ щытащ «эфир занщIэр» щригъэкIуэкIам икIи къелъэIуат зэхуэзэу зэдэуэршэрыну.
ЗэIущIэм и пэщIэдзэм КIуэкIуэм яжриIащ: «ЛIыхъужьхэм я щIэблэ» проектыр зигу къэкIар Урысейм и Президент Путин Владимирщ. Абы къыхигъэщащ ди къэралым и къэкIуэнур зэрелъытар нобэ я лIыгъи, хахуагъи, гъащIи щымысхьу къэралым къулыкъу хуэзыщIэхэм. Зи нэхъыжьыр, адэр дзэ Iуэху хэхам щыIэ, хабзэхъумэ IэнатIэм пэрыт унагъуэм щIэблэ узыншэщ къихъуэнур. Ахэр сытым дежи хьэзырынущ Хэкум, ныбжьэгъум, жылагъуэм къыхуэсэбэпыну. Мы проектым ныбжьыщIэ 900 къызэщIеубыдэри, я гъащIэр адэкIэ зэраубзыхунум егупсысакIэщ. Нэхъ пасэу ар зэбгъэзэхуэху, нэхъыфIым ухуишэну аращ. Дэ сыт и лъэныкъуэкIи зыфщIэдгъэкъуэну дыхьэзырщ».
Фигу къэдгъэкIыжынщи, «ЛIыхъужьхэм я щIэблэ» проектыр къыщIыхалъхьар дзэ Iуэху хэхам щыIэхэмрэ абы и ветеранхэмрэ я бынхэм IэщIагъэ къыхахыу, гъащIэм лъэ быдэкIэ хэувэнымкIэ къэралыр сэбэп яхуэхъун папщIэщ. Мы гъэм мы лэжьыгъэр щокIуэкI Урысейм и хэгъэгу 21-м. ЕтIанэгъэ щыщIэдзауэ Пэрытхэм я зэгухьэныгъэр нэхъыбэу зэлэжьыну Iуэхухэм ящыщ зыуэ щытынущ. Ди республикэм зи гугъу тщIым щолэжь КъБР-м ЩIалэгъуалэм я IуэхухэмкIэ и министерствэр, «Росмолодежь»-р, Пэрытхэм я зэгухьэныгъэр.
НыбжьыщIэхэр зэпсэлъащ, дэзыхьэххэм, ехъулIэныгъэхэм, мурадхэм теухуауэ. Къэхутэныгъэ лэжьыгъэхэр здрагъэкIуэкIым, абыхэм къащIащ лъэпкъым щыщ лIыхъужьхэм, Хэку зауэшхуэм и ветеранхэм, Лэжьыгъэм и ЛIыхъужьхэм, егъэджакIуэ, дохутыр, спортсмен, щэнхабзэм и лэжьакIуэ цIэрыIуэхэм я хъыбар куэд.
КъызыхуигъэщIа, нэхъ дэзыхьэх IэщIагъэр зыхуэдэр къащIэн папщIэ, IэщIагъэлIхэр ядэлэжьащ школакIуэхэм.
Ахэр IуэхущIапIэ зэмылIэужьыгъуэхэм щыIащ, абыхэм я унафэщIхэм епсэлъащ. Сабийхэм къахуэзащ КъБР-м и прокурор Хабаров Николай, УФ-м и Президентым и Полномочнэ лIыкIуэу Ипщэ Федеральнэ щIыналъэм щыIэм и дэIэпыкъуэгъу Валиев Айдамир, КъБР-м и Iэтащхьэм и чэнджэщэгъу Миронов Николай, КъБР-м экономикэ зыужьыныгъэмкIэ и министр Рахаев Борис, УФ-м и Минюстым и къудамэу КъБР-м щыIэм и унафэщI Кужонов Жантемыр, КъБР-м егъэджэныгъэмрэ щIэныгъэмкIэ и министр Езауэ Анзор, ЩIалэгъуалэм я IуэхухэмкIэ и министр Лу Азэмэт, узыншагъэр хъумэнымкIэ министр Къалэбатэ Рустам, бжыгъэхэр зи лъабжьэ зыужьыныгъэмкIэ, зэпыщIэныгъэмрэ хъыбарегъащIэ IэнатIэхэмкIэ министр Бозий Аскэр, «Хэкум и хъумакIуэхэр» къэрал фондым ди щIыналъэм щиIэ къудамэм и унафэщI Дадэ МуIэед, КъБР-м и Налшык щIыпIэ дзэ судым и унафэщI Мэлбахъуэ Ахьмэд, Федеральнэ антимонопольнэ къулыкъущIапIэм и къудамэу КъБР-м щыIэм и Iэтащхьэ Къумахуэ Аннэ, КъБР-м и Нотариальнэ палатэм и президент Хьэкъул Майе, КъБР-м щIыналъэ Iуэхухэр зэфIэхынымкIэ и центрым и унафэщI КIэдыкIуей Мадинэ, Урысейм и юристхэм я зэгухьэныгъэм хэт КIуэкIуэ Дианэ, Пэрытхэм я зэгухьэныгъэм и тхьэмадэ Шыпш Аслъэн, дизайнер цIэрыIуэ Сэралъп Мадинэ сымэ.
КъБР-м и Iэтащхьэм фIыщIэ яхуищIащ гъэсакIуэ пэлъытэу, чэнджэщэгъуу ныбжьыщIэхэм къадэлэжьа дэтхэнэ зыми.
«ЛIыхъужьхэм я щIэблэ» зэIущIэм хэтахэм щыIэкIэ-псэукIэр езыгъэфIэкIуэн мурад гъэщIэгъуэнхэр утыку кърахьащ, ахэр гъащIэм хэпща зэрыхъунум и хэкIыпIэхэр къагъэлъэгъуащ. КIуэкIуэр а псоми едэIуа нэужь, ныбжьыщIэхэм я упщIэхэм жэуап яритащ икIи ехъулIэныгъэхэр яIэну ехъуэхъуащ. Iэтащхьэм къыхигъэбелджылыкIащ сабийхэм я жэрдэмхэр сыт щыгъуи къэралым, республикэм зэрадиIыгъынур.
КIуэкIуэ Казбек школакIуэхэм яхуэза нэужь жиIащ абыхэм зэрепсэлъар хуабжьу игу зэрыдыхьар, нэгъуэщI Iуэхугъуэ куэдым зэрыригъэгупсысар. Апхуэдэуи дыщIигъуащ етIанэгъэ гъатхэм адрей хэгъэгухэм мыбы ещхьу щагъэзащIэ Iуэхум хэт щIалэгъуалэр ди республикэм кърагъэблагъэу Хэку зауэшхуэм къыщытхьа ТекIуэныгъэр илъэс 80 зэрырикъум иращIэкIыну дауэдапщэхэм хагъэтыныр игъуэу къызэрилъытэр. Iэтащхьэм и жэрдэмыр ягу ирихьащ ныбжьыщIэхэм. Абы иужь ихьэнущ КъБР-м ЩIалэгъуалэ IуэхухэмкIэ и министерствэр.
