Ныкъуэдыкъуэхэм я дунейпсо махуэм трагъахуэу, дыгъэгъазэм и 3-м, сабийхэм пшыхь гукъинэж щыхуащIащ Узыншагъэр щрагъэфIакIуэ «Лэгъупыкъу» центрым. Ар къызэрагъэпэщат КъБР-м Лэжьыгъэмрэ социальнэ дэIэпыкъуныгъэмкIэ, ЩэнхабзэмкIэ и министерствэхэм.
«Лэгъупыкъум» и пэшышхуэм щызэхуашэсат зи узыншагъэм сэкъат иIэ сабийхэмрэ абыхэм я адэ-анэхэмрэ, егъэджакIуэхэр, гъэсакIуэхэр. Пшыхьыр къыщызэIуахым, цIыхухэр ирагъэдэIуащ гуапагъэр зищIысым, и мыхьэнэм, ар къызэрыпхуэщэхуным, цIыхум и гум илъу къыдэгъуэгурыкIуэн зэрыхуейм. «Гуапагъэр зэи жьы хъуркъым, абы цIыхур еIэт, «ин» ещI. Ауэ сытми «псалъэ гуапэр хущхъуэщ» жаIэркъым. Гуапагъэр къыпхуэмыIуэтэн гуэрщ, абыкIэ цIыхум ухуэупсэн хуейщ. Аращ зытеухуар ди пшыхьыр», - къыхагъэщащ ар езыгъэкIуэкIахэм.
Мы Iуэхум хэтащ КъБР-м и Парламентым и УнафэщI Егоровэ Татьянэ, КъБР-м и Iэтащхьэм и чэнджэщэгъу Уянаевэ Iэминат, КъБР-м и Парламентым и депутат, «Афганистанымрэ дзэ Iуэху хэхахэмрэ я ветеранхэм я зэгухьэныгъэ» Къэбэрдей-Балъкъэр жылагъуэ IуэхущIапIэм и унафэщI Тхьэгъэлэдж Тимур, КъБР-м лэжьыгъэмрэ социальнэ дэIэпыкъуныгъэмкIэ и министр Тогузаев Тахир, КъБР-м щэнхабзэмкIэ и министр Къумахуэ Мухьэдин, КъБР-м егъэджэныгъэмрэ щIэныгъэмкIэ и министрым и къуэдзэ Мокаев Ачемиз, КъБР-м сабийм и хуитыныгъэхэмкIэ и уполномоченнэ Лъынэ Светланэ, КъБР-м ис ЦIыхубзхэм я зэгухьэныгъэм и унафэщI Къаскъул Аулият, Сабий ныкъуэдыкъуэхэм я адэ-анэхэм я урысейпсо IуэхущIапIэм и щIыналъэ къудамэм и унафэщI Бозий Маринэ, Зи нэм имылъагъухэм я урысейпсо зэгухьэныгъэм Налшык къалэм щиIэ къудамэм и унафэщI Ульбашевэ Хьэлимэт, Сабий-ныбжьыщIэ творчествэмкIэ къалэ центрым и унафэ-
щIым егъэджэныгъэ-гъэсэныгъэ IуэхухэмкIэ и къуэдзэ Къэзакъ Жаннэ, Сабий-ныбжьыщIэ творчествэмкIэ Налшык къалэ центрым и унафэщIым Iуэхугъуэ зэхуэмыдэхэр къызэгъэпэщынымкIэ и къуэдзэ Кертбиевэ Залинэ.
- Къаруушхуэ зыбгъэдэлъ ди сабийхэм нобэ я махуэщ. Дэ долъагъу бэшэчу икIи ерыщу егъэджэныгъэм, спортым, гъуазджэм ехъулIэныгъэшхуэхэр зэрыщызыIэрывгъэхьэр, уеблэмэ гъащIэр фIыуэ зэрыфлъагъумрэ абы жыджэру фызэрыхэтымкIэ адрейхэм щапхъэ фазэрыхуэхъур. А псор, шэч хэмылъу, пщIэ зыхуэфащэ лэжьыгъэщ, - къыхигъэщащ Егоровэ Татьянэ сабийхэм защыхуигъазэм. - Нобэ къэралым гулъытэ хэха хуещI зи узыншагъэм сэкъат иIэхэм защIэгъэкъуэным - егъэджэныгъэ жыпIэми, медицинэ Iуэхуу щытми. Апхуэдэ лэжьыгъэр гъэ къэс зэредгъэфIэкIуэнум дэ и ужь дитщи, дыхуейт мы Iуэхум иджыри цIыху куэд къеувэлIэну. Дызэгъусэу куэд тхузэфIэкIынущ! ФIыщIэ щхьэхуэ яхуэфащэщ адэ-анэхэм зи гуапагъэмрэ гулъытэмрэ хэмыщIу сабийхэм якIэлъыплъхэм. ИкъукIэ къыпхуэмылъытэн хуэдиз къалэнышхуэ фогъэзащIэ. Фи унагъуэхэм сыт щыгъуи гу хуабагъэ илъыну, узыншагъэ фиIэну, фи къарур мыкIуэщIрэ гукъыдэж ин фхэлъу фыпсэуну си гуапэщ».
Тхьэгъэлэдж Тимур фIыщIэ яхуищIащ зи узыншагъэм сэкъат иIэ сабийхэм ядэлажьэхэми адэ-анэхэми. Абы Афганистанымрэ дзэ Iуэху хэхахэмрэ я ветеранхэм я зэгухьэныгъэм къыбгъэдэкIыу цIыху зыбжанэм щIыхь тхылъхэр яритащ: «Лэгъупыкъу» центрым зэрагъэхъуж физическэ щэнхабзэмкIэ и инструктор Бэрсэдж Мыхьэмэт, «Лэгъупыкъум» узыншагъэр щрагъэфIакIуэ и къудамэм и унафэщI Мусуковэ Танзиля, психолог Бэдрак Джамилэ, Налшык къалэм и курыт еджапIэ №23-м и педагог-психолог Базаев Расул сымэ. «ЩIэблэм дыфщогугъ. Къэралым и зыужьыныгъэр зыхуэдэнур зэлъытар фэращ. Узыншагъэ фиIэну, фIыуэ феджэну, щIэныгъэ куу зэвгъэгъуэтыну дынывохъуэхъу, ди нэхъыжьхэм я щIэиныр фхъумэну ди хъуэпсапIэщ, - жиIащ депутатым.
АдэкIэ сабийхэр къафэхэмрэ уэрэдхэмрэ я псысэ телъыджэм хашами ярейт. Пшыхьым цIыкIухэм я гукъыдэжыр къыщаIэтащ «Кавказ пшэплъхэр», «Эльбрус», «Арабеск» сабий ансамблхэм, уэрэдхэр ягъэзэщIащ Иуан Каринэ, Ким Виктор, Болэт Мирабель сымэ. Пэшым щIэсхэр ягъэгушхуащ, ягъэджэгуащ, псэущхьэ зэмылIэужьыгъуэхэм ещхьу зызыхуэпахэм абыхэм я гукъыдэжыр къаIэтащ. Пшыхьым и курых хуэдэт «сабий дыгъэхэр» утыкум къыздрашэу, IэпэтэрмэшкIэ уэрэдым зэрыдежьууар. Пшыхь нэужьым сабийхэм IэфIыкIэхэмрэ псы IэфIхэмрэ хуагъэхьэзырауэ къапэплъэрт.
Гуапагъэ, гущIэгъу, зэрылъытэ - мыпхуэдэ гурыщIэхэр тщIыгъумэ, ди гъащIэри, шэч хэмылъу, нэхъ тынш хъунущ.
БАГЪЭТЫР Луизэ.
