30 сентября, 2019 - 06:44
Iуащхьэмахуэ лъапэ щекIуэкIащ нейрохирургием и нейрореабилитацэмкIэ IV дунейпсо щIэныгъэ-практикэ конференц. Абы хэтащ Кавказ Ищхъэрэ щIыналъэм хыхьэ республикэхэм я лIыкIуэхэу дохутыр 200-м щIигъу. Зэхыхьэр зэгъусэу къызэрагъэпэщащ УФ-мрэ КъБР-мрэ Узыншагъэр хъумэнымкIэ я министерствэхэм, Урысейм и нейрохирургхэм, реабилитологхэм я зэгухьэныгъэхэм, Къэбэрдей-Балъкъэр къэрал университетым.
Конференцым и щIэныгъэ Iыхьэм и унафэщIу щытащ УФ-м Узыншагъэр хъумэнымкIэ и министерствэм медицинэ реабилитацэмкIэ и IэщIагъэлI нэхъыщхьэ, Пироговым и цIэр зезыхьэ Урысей медицинэ университетым и кафедрэхэм ящыщ зым и унафэщI Ивановэ Галинэ. Дохутырхэм лекцэ къахуеджахэщ Москва дэт медицинэ институтхэм, центрхэм я профессорхэр.
КъБР-м узыншагъэр хъумэнымкIэ и министр Хъубий Марат IэщIагъэлIхэр щигъэгъуэзащ щIыналъэм нейрореабилитацэмкIэ щрагъэкIуэкI Iуэхухэм икIи къэралым и медицинэ центр цIэрыIуэхэр къазэрыдэлажьэм папщIэ фIыщIэ яхуищIащ. Ивановэ Галинэ а унэтIыныгъэмкIэ республикэм щыIэ щытыкIэм зыубгъуауэ тепсэлъыхьащ икIи дохутырхэм чэнджэщ щхьэпэхэр яритащ. Абы къыхигъэщащ самаджэр зэфIэувэжынымкIэ медицинэ реабилитацэм мыхьэнэшхуэ зэриIэр икIи гулъытэ хуащIыну къыхуриджащ.
- А Iуэхум теухуауэ УФ-м Узыншагъэр хъумэнымкIэ и министерствэм къищта унафэм 2020 гъэм и гъатхэпэ мазэм къару игъуэтынущ. Абы ирихьэлIэу дэтхэнэ медицинэ IуэхущIапIэми зы дохутыр щылэжьэн хуейщ физическэ, реабилитационнэ медицинэмкIэ и щIэныгъэм зэрыхигъэхъуэжамкIэ тхылъ иIэу. Къызэрагъэпэщыну гуп щхьэхуэм хэтынущ физическэ, реабилитационнэ медицинэмкIэ дохутыррэ медсестрарэ, кинезотерапевт, эрготерапевт, логопед, психолог, - жиIащ Ивановэм.
Хъубий Маратрэ Ивановэ Галинэрэ тепсэлъыхьащ республикэр федеральнэ клиникэхэм ядэлэжьынымкIэ щыIэ Iэмалхэм, апхуэдэуи нейрореабилитацэмкIэ центр щхьэхуэхэм квотэкIэ сымаджэхэр зэрагъэкIуэнум теухуа зэгурыIуэныгъэхэр зэращIылIэну я мурадщ.
- Узыншагъэр хъумэнымкIэ IэнатIэм и унэтIыныгъэ щхьэхуэу нейрореабилитацэр IэщIагъэлIхэм къызэрыхагъэщхьэхукIрэ куэд щIакъым, ауэ ар дызыхуэныкъуэщ, абы къыхэкIыуи дяпэкIэ а Iуэхум зедгъэужьын хуейщ, - жиIащ Хъубий Марат. - НейрохирургиемкIэ операцэ ящIа, фэбжь зыгъуэта сымаджэхэр тэмэму зэфIэувэжынымкIэ ар икъукIэ зыхуэныкъуэщ, абы и фIыгъэкIи ахэр нэхъ псынщIэу икIи тыншу гъащIэм хэшэжа хъунущ. Конференцыр гъэщIэгъуэну екIуэкIащ, шэч хэлъкъым дохутырхэм щхьэпэ яхуэхъун куэд абы къызэрыщащIам, апхуэдэуи нейрореабилитацэ IэнатIэр къызэгъэпэщынымкIэ гулъытэ зыхуэщIыпхъэхэр наIуэ къытщищIащ.
