Ипщэ дзэ округым и зауэлIхэм дзэ Iуэху хэхам къахуигъэув къалэнхэр ягъэзащIэ­кIэрэ, НАТО-м хыхьэ къэралхэм щащIа Iэ­щэрэ зауэ Iэмэпсымэу Украинэм къы­щы­т­рахахэр утыку къыщрахьа гъэлъэгъуэныгъэм щыIащ КъБР-м и Iэтащхьэ КIуэкIуэ Казбек. 

Дыгъэгъазэм и 28-м Налшык къыщызэ­Iуаха гъэлъэгъуэныгъэм хэтащ лъэсыдзэм къигъэсэбэп дзэ машинэхэу М2 «Брэдли» (США), «Мадер» (Германие), CV90 (Швецие), БМП-1У (Украинэ), шэ зыпхымыкI дзэ ма­-шинэхэу М113А4, Cougar MRAP (США), М113G3DK (Дание), FV 103 Spartan (Инджы­лыз), бронеавтомобилхэу Roshel (Канадэ), «Вартэ», «Козак-2М1», БТР-3Е1 и БТР-4Е ­(Украинэ), гъуэгуанэ кIыхь зэпычыным хуэ­щIа автомобиль HMMWV «Хамви» (США), украин танк Т-64БВ «Булат», къинэмыщI дзэ хуэIухуэщIэхэр. 
ЩIыпIэ щхьэхуэ хухахат тIасхъэщIэх Iэмэ­псымэхэм, цIыху зэрымыс кхъухьлъатэ-ла­гъы­мыдзхэм, бийм танкхэмрэ топышэмрэ зэ­рызыщихъумэ Iэмэпсымэхэм. 
Бийм и дзэ техникэр къазэрыIэрыхьа щIы­кIэм тепсэлъыхьыжащ дзэ Iуэху хэхам хэтхэр. Урысейм щыпсэухэр а щIыпIэм щекIуэкIым щыгъуазэ ящIын, зыпэщIэт лъэныкъуэр зэ­рыузэда Iэщэхэр цIыхухэм ирагъэлъагъун ­папщIэ, пIалъэ хэхакIэ ахэр къалэхэмрэ рай­онхэмрэ къэкIуэжат, дэтхэнэ зыми хъыбар щхьэхуэ игъэхьэзырауэ. 
«Мы гъэлъэгъуэныгъэр Къэбэрдей-Балъ­къэ­рым зэрыщекIуэкIым сыщогуфIыкI. Абы дигу къегъэкIыж ди зауэлIхэр зэрыхахуэр, абыхэм лIыгъэшхуэ зэрахэлъыр, псоми ди зэхуэдэ ТекIуэныгъэр нэхъ псынщIэу къэсын, ди къэралыр къахъумэн папщIэ, ахэр зыпхыкI гугъуехьым и инагъыр къыдгурагъаIуэ. Дзэ Iэмэпсымэ кхъуентхъыр урысей армэм узэ­рытемыкIуэным иджыри зэ и щыхьэту къоув. Хэкум и хъумакIуэхэм фIыщIэшхуэ яхузощI. ТекIуэныгъэр фи Iэпэгъуу фыкъэкIуэжыну дыфпоплъэ! Ар Урысейм ей зэрыхъунум шэч хэлъкъым!» - жиIащ КIуэкIуэ Казбек, гъэлъэгъуэныгъэм щытепсэлъыхьым. 
Гъэлъэгъуэныгъэр къыщызэIуаха япэ махуэм абы мин бжыгъэкIэ екIуэлIащ къалэ­дэс­хэмрэ республикэм щыхьэщIэхэмрэ. Кадетхэр, школакIуэхэр, студентхэр, IуэхущIапIэ зэ­мылIэужьыгъуэхэм, къулыкъущIапIэхэм я ­лэ­жьакIуэхэр, цIыхубэ жыджэракIуэхэмрэ ту­ристхэмрэ, дзэ Iуэху хэхам и ветеранхэмрэ абыхэм я унагъуэхэмрэ - цIыху куэд къызэщIиубыдащ хэкупсэ дауэдапщэм. Гъэлъэгъуэныгъэм екIуэлIахэм язщ Урысейм и ЛIыхъужь, Ипщэ дзэ округым и унафэщIхэм я лIыкIуэ ­Зубахин Иван. 
«Хэкум и хъумакIуэхэм я зэфIэкIым дрогушхуэ» - аращ мы гъэлъэгъуэныгъэм фIащар КъБР-м щыпсэухэм.