Къабарты-Малкъарда "Къоркъуусуз эмда тынгылы жолла" миллет проектге кёре, аслам иш этиледи. Аны кезиуюнде иги материалла, жангы технология хайырланырча эм болжалдан кеч къалмай тамамланырча Битеуроссей халкъ фронтну (ОНФ) бёлюмюню келечилери дайым кёз-къулакъ болгъанлай турадыла. Ол санда жамауатны тилеклери  толтурулурча жолчуланы эслерине саладыла.

Бу жол ОНФ-ну келечилери Транспорт эмда жол мюлк министерствону келечилери бла бирге кёп болмай  тынгылы ремонт этилген  «Аргудан – Александровская» жолда болуп, болум бла шагъырейленнгендиле. Аны узунлугъу 16,5 километрге жетеди. Ол  къоншу регионлагъа баргъан,  Лескен, Урван, Терк эм  Май районла байламлыкъ жюрютген экономика эм социал жаны бла да  магъаналы   жолду.
Кёп заманны ичинде былайда жашагъанла эм водительле да  жол мардалагъа келиширча тилей тургъандыла. Ол себепден аланы   оюмлары да эсге алынып, жол   эки ыздан тёртге дери кенгертилгенди. Андан сора да, къоркъуусузлукъгъа да аслам эс бурулгъанды. Аны кезиуюнде темир буруу тартылгъанды, жорукъну билдирген белгиле, изла да салыннгандыла.

Эсге сала айтсакъ, былайтын кюннге он минг чакълы машина жюрюйдю. Ол себепден аны мурдорун иги кючлегенлеринден тышында, юсюне юч къат асфальт жайгъандыла. Ызы бла Аргуданы Арамисов  атлы орамына да асфальт салыннганды.  Бусагъатда специалистле Регион фонддан берилген ахчагъа жолну узуну бла чыракълы чыпынла тарта турадыла.

- Республиканы жол управлениясыны келечилери бла бирге  быйыл тынгылы ремонт этилген объектледе болуп, болумлары бла шагъырейленебиз.  Бу жол  «Аргудан – Александровская» жолгъа къараргъа келгенбиз. Ол жангыртылгъандан сора  танымазча игилендирилгенди - сыйдам, омакъ  эм  къоркъусууз болгъанды.   Этилген иш эм  материалла да ГОСТ-ха келишедиле.  Объект болжалдан алгъа хайырланыргъа берилгенни  да энчи белгилерчады. Бюгюнлюкден  специалистле элни ичи бла баргъан жол жарыкъ болурча чыпынлы чыракъла сала турадыла, ол себепден  участок  толусунлай жангы излемлеге келиширикди,- дейди ОНФ-ну келечиси Изабелла Косумова.

Бизни корр.