Урысей Федерацэм и Правительствэм и деж Къэралым и щIыналъэхэм зегъэужьынымкIэ щыIэ комиссэм и зэIущIэ иджыблагъэ екIуэкIащ. Абы щыхэплъащ щIыналъэхэм щылажьэ лъэпкъ пэхуэщIэхэмрэ федеральнэ программэхэмрэ, 15-м щIигъур зэрагъэзащIэ щIыкIэмрэ абыхэм къарикIуахэмрэ.

УФ-м и Правительствэм и УнафэщIым и къуэдзэ Хуснуллин Марат къыхигъэщащ ехъулIэныгъэ нэхъыфIхэр абыхэм щызиIэ щIыналъэхэр. Абыхэм яхэтщ Къэбэрдей-Балъкъэрыр, Адыгейр, Тэтэрстаныр, Башкириер, Шэшэныр, Пензэ, Новгород Ищхъэрэ, Новгород, Курск, Оренбург областхэр. Апхуэдэуи абы жиIащ лъэпкъ пэхуэщIэхэмрэ федеральнэ программэхэмрэ къыщыгъэлъэгъуа Iуэхугъуэхэр ныкъусаныгъэншэу щIыпIэхэм щыгъэзэщIа хъун щхьэкIэ, тэмэму псори зэпэлъытауэ ахэр зэтеухуэн, убзыхун зэрыхуейр. Сыту жыпIэмэ, абыхэм куэдкIэ елъытащ цIыхухэм я псэукIэр егъэфIэкIуа хъуныр.

ЕтIанэгъэ къыщыщIэдзауэ ирагъэжьэнущ «ПсэукIэр егъэфIэкIуэным хуэщIа инфраструктурэ» лъэпкъ проектыщIэр. Абы ипкъ иткIэ щIыналъэхэм щхьэж къылъысу къалэн щащIыну Iуэхугъуэхэр иджыпсту яубзыху. Правительствэм и УнафэщIым и къуэдзэм къыхигъэщащ инфраструктурэм и зыужьыныгъэр энергетикэмрэ ухуэныгъэмрэ ехьэлIа Iуэхугъуэхэм нэхъыбэу зэрепхар.

ЗэIущIэм хэтахэр тепсэлъыхьащ гъуэгу лэжьыгъэхэми. «ГъуэгуфI шынагъуэншэхэр» лъэпкъ пэхуэщIэм къыщыгъэлъэгъуа Iуэхугъуэхэр зэрагъэзащIэ щIыкIэмкIэ Къэбэрдей-Балъкъэрым япэ увыпIэр къэралым щиIыгъщ. Республикэм къыпэщылъа къалэнхэр къанэ щымыIэу зэфIигъэкIащ: иужьрей илъэсихым къриубыдэу псори зэхэту километр 1118-рэ зи кIыхьагъ автомобиль гъуэгухэр щызэрагъэпэщыжащ, гъуэгу Iуфэ уэздыгъэхэр псори зэхэту километр 375-м щыпадзащ. 2024 гъэм къриубыдэу автомобиль гъуэгуу километри I50-р щыIэ мардэм кърагъэтIэсащ, километр 75-р иджырей уэздыгъэхэмкIэ къызэщIагъэнэхуащ.

Дызэрыт илъэсым и кIэм ирихьэлIэу щIыналъэ гъуэгум и процент 74-р щыIэ мардэм хуагъэкIуэнущ, атIэми, къэралым щагъэувар - 2030-м ирихьэлIэу апхуэдэ гъуэгухэм я процент 60-р зэIузэпэщ щIынырщ.

ХЬЭЩЫКЪУЕЙ Олег.