Кёп болмай Къабарты-Малкъар къырал университетни менеджмент, туризм эм къонакъбайлыкъны  къурау институтуну преподавательлери Байсолтанланы Лейля, Станислав Кущев, Елена Анищенко башхала бла бирге  3,178 метр бийикликде болгъан  Акъ-Топуракъ къышлыкъда  «География диктантха»  къатышхандыла. Кийик табийгъатда баргъан сейир проектге КъМР-ни  Парламентини Председателини орунбасары Жанатайланы Салим да къошулгъанды. Ол жыйылгъанлагъа Чегем ауузуну  тауларыны, жерлерини атларын  айтып, билимлерин байыкъландыргъанды. 

Орус география биригиуню  республикада бёлюмюню таматасы Аксана Карашева быллай акцияны жарыкъландырыу жаны бла  магъанасы уллу болгъанын  айта, бу жол къонакъда  жомакълы табийгъатда болгъанларын белгилегенди.  

– «Бу 141-чи майданды эм болмагъанча   тамаша жерди.  Бюгюн мында  эм батырла эм  чыдамлыла жыйылгъандыла. Нек дегенде таулагъа ёрлерге кёпле хазыр тюйюлдюле»,- дегенди ол.
Байсолтанланы Лейля айтханнга кёре, диктантха  ол бир кесек къайгъы этип  тюбегенди.  

– Бюгюн «Географиядан диктант» мени ёз жеримде, Чегем ауузунда ётгени бек кёллендиреди. Аны жомакълы табийгъатыны юсюнден Къулийланы Къайсын  назмуларында кёп кере жазгъанды. Аныча толу, ариу   суратларыкъ хазна табылсын.   

Чал баш къаяла, терк саркъгъан  тау суучукъла эм саулай кийик табийгъатны ариулугъу  чыгъармачылыкъ иш бла кюрешмегенлени да жюреклерин  бийлемей къоймайды. Бу жерледе хар ташны тарыхы барды. Ариу чакъгъан  терекле да адамланы кёп жарсыуларын, къууанчларын кёргендиле. Андан сора да, Акъ-Топуракъ къышлыкъда 1970 жыллада  «Земля Санникова» деген белгили фильм тюшюрюлгенди. Кинода бу жерге энчи эс бериледи – тасханы жашыргъан, адамны  кёз къарамын тюрлендирген шартхача, – дейди Лейля.  

 Хауа болум  иги болгъаны себепли, къонакъла диктантха жарыкъ кёллери бла къатышхандыла. Табийгъат эслерин бийлер ючюн къоймаса да, жазып,  борчларын толтуралгъандыла.  
Диктантха къатышханланы барысына да сертификатла эм Орус география обществону саугъалары берилгендиле.

Эсигизге салайыкъ, биринчи диктант 2015 жылда жазылгъанды. Ол заманда анга жангыз да Россейде жашагъанла къатышхандыла, эки жылдан а анга тыш къыралланы келечилерини да сейирлери эсленнгенди. Жарыкъландырыу акция бардырылгъан заманны ичинде географиядан билимлерин 126 къыралдан адамла сынагъандыла, аланы саны 2 миллиондан аслам болгъанды.

Курданланы Сулейман хазырлагъанды.