Кёп болмай Къабарты-Малкъар къырал университетде  жаш алимлени стратегиялы  сессиялары болгъанды.  Анга  республиканы  вузларындан, институтларындан  эм илму араларындан кёпле къатышхандыла. Анда сёз жаш алимле илмугъа тартылырча эм аны даражасын ёсдюрюрча этиуню юсюнден баргъанды.  

Жыйылыуну башлай, КъМР-ни Парламентини Председателени орунбасары  Мурат Карданов жаш алимлеге ишлеринден къууанырларын, кёп жетишимле болдурурларын  тежегенди.  КъМР-ни Правительствосуну Председателини орунбасары   Марат Хубиев а, стратегиялы сессияны магъанасы уллу болгъанын белгилей, республикада жаш  адамлагъа энчи эс бурулгъанын чертгенди. 

- Бюгюнлюкде саулай къыралда да илмугъа  бийик технологияланы сингдириуге, жангы кадрла да къошулурларына къайгъырылады.  Бизде  фахмулу жаш  адамла кёпдюле. Алагъа илму тинтиуле бардырыргъа, проектлерин башларгъа,  къыралны жанындан болушлукъ алыргъа эм башха жаны бла да тюрлю-тюрлю  онгла къураладыла. Ол а бюгюнлюкде илму бек керек болгъанын ачыкълагъан шартды. Эсге сала айтсакъ, КъМР-ни Башчысы илму жаны бла беш премия тохташдыргъанды эмда аланы жыл сайын береди.   Бу жол да  саугъагъа тийишлилени атлары  жууукъ заманда   белгили боллукъдула, -  дегенди Марат  Хубиев.  

Къабарты-Малкъар къырал университетни ректоруну къуллугъун толтургъан  Юрий Альтудов илму-техниканы айнытыу  Россейни къырал политикасыны магъаналы кесеги болгъанын эсге салгъанды. 

- Бюгюнлюкде КъМКъУ-да жаш алимле илму, технологиялы предпринимательство бла кюреширча онгла къуралгъандыла. Болсада къыйматлы проектле жашауда бардырылыр ючюн бизнесни жанындан болушлукъ керекди. Къысхасы, инновация  стратегия жетишимли болур ючюн  бизнес бла илму бирикмей жарарыкъ тюйюлдю, - деп къошханды ол.

Бийик билим берген окъуу юйлени илму жаны бла  проректорлары эм Бийик-тау геофизика  институтну келечилери уста  кадрла хазырлау, жаш алимлеге болушлукъ тапдырыу жаны бла не мадарла этилгенлерини юсюнден да айтылгъанды жыйылыуда. 
КъМКъУ-ну илму-излем иш  жаны бла проректору Светлана Хаширова айтханнга кёре, бюгюнлюкде университетде 416 жаш алим урунады эм 4 диссертация совет ишлейди.  Жыл сайын вузда жангы илму арала, лабораторияла ачыладыла. Аны бла бирге  грантлагъа конкурсла да ётедиле. Андан сора да, жаш алимле тюрлю-тюрлю стипендиялагъа тийишли боладыла.  Дагъыда диссертацияларын къоруулагъанла, илму статьяла басмалагъанла да ахча бла саугъаланадыла. 

Сёз ючюн, аспирант Асланбек Тлупов алгъаракълада биргесине ишлегенле бла  "Титан" биригиуню премиясына - 10 миллион сомгъа - тийишли болгъанды. Аны хайыры бла  проектлерин бардырыргъа  онг табылгъанды. Аланы башламчылыкъларына къыралны нефтехимия бёлюмню биригиулеринден бири болушурукъду. 

Нальчик шахарны аминистрациясыны жаш тёлю политика жаны бла управлениясыны таматасыны къуллугъун толтургъан  Анзор Афашагов а университетледе эсгертиуле бла болушхан, жаш алимлени  проблемалары бла кюрешген координация  совет къуралса, иги боллугъун айтханды. Андан сора да, жыйылыуда экономика жаны бла къыйматлы проектле бла кюрешген жаш алимлеге ахча болушлукъ этилсе, ол санда грантла бёлюнселе, налог льготала тохташдырылсала эм башха онгла да берилселе, дагъыда  илму проектлени бардырыргъа бизнес да къошумчулукъ этсе,   илмугъа тартылгъан жаш адамла бютюн кёп боллукъ эдиле, деп белгиленнгенди.

Эсгертиу: стратегиялы  сессия Нальчик шахарны  аминистрациясыны  жаш тёлю политика жаны бла  управлениясыны башламчылыгъы бла КъМР-ни Жаш тёлю парламенти болушуп бардырылады. 

Курданланы Сулейман хазырлагъанды.