Къабарты-Малкъарда "Къоркъуусуз эм тынгылы автомобиль жолла" миллет проектни чеклеринде туризм объектлеге баргъан жолла тап эм къоркъуусуз болур ючюн аслам иш этиледи. Бу жаны бла Къабарты-Малкъарда магъаналы да,  уллу да  объектледен бирине Экинчи Чегем - Булунгу жолну санаргъа боллукъду. Аны 27 километринде тынгылы ремонт ишле бардырылгъанлы иги кесек болады. 

Мында  черек жагъаланы кючлейдиле, жардан таш, топуракъ тюшмезча,  жауун суула саркъырча мадар этиледи.   Ызы бла специалистле, жолну мурдорун  жарашдырып, тротуарла салып, къоркъуусузлукъну жалчытырча аберилени да тохташдырып башларыкъдыла. 

Проектге кёре, Черек чучхурладан башлап огъартын эки машина бир жолгъа ёталмагъан жерледе  жол  жети метрге кенгертилгенди. Кече жарытырча чыракъла тартылгъандыла эм жаяу жюрюгенлеге тротуарла, машинала сюелирча, къараучу жерле да жарашдырылгъандыла. Къоркъуусузлукъ жалчытылынырча да бир къауум жумуш тамамланнганды. Ол санда жолну мурдору  кючленеди, жауун суу саркъырча быргъыла, арыкъла салынадыла, жардан таш, топуракъ оюлмазча, черек жагъаларын таламазча бетондан хунала ишленедиле. 

Къыш кезиуде черекле таркъайгъанда, кёпюрлени чигинжилерин салыргъа тап болады. Анга кёре кёпюрчюле Чегем эм Жылгы суулада тийишли ишле бла кюрешедиле. Эм биринчи аркъауланы тутарыкъ  чигинжилени эм хунаны да салып бошап, комплексли халда  башха жумушланы  тамамлайдыла. 

Саулай алып айтханда, «Къоркъуусуз эм тынгылы автомобиль жолла» миллет проектге кёре эм Регион фондха быйылны ахырына Чегем, Кёк-Таш, Джуунгу суу, Абардан суу, Жылгы суу, Булунгу суу черекледе узунлукълары  214 метрге  жетген тогъуз кёпюрню хайырланыргъа берирге  керекди. Бюгюнлюкде  аланы бешисинде неда 112,13 метр чакълы бирине тынгылы ремонт этиле турады. Быйылны ахырына энтта да 102,4 метр чакълы бирде   тёрт кёпюрге  къараллыкъды.