Нальчикде жалгъан терилени комбинатыны («Искож») мурдору 1959 жылда салыннганды. Аны биринчи башчысы Кудаев Черим болгъанды, ол кеси да анда пенсиягъа кетгинчи ишлеп тургъанды. КъМР-ни Архив службасында жарашдырылгъан къысха материалда бу комбинатны тарыхыны юсюнден айтылады.

Бизни республикада промышленностьха озгъан ёмюрню 60-70 жыллары бек тири айныгъан кезиу болгъанды. Анга, сора экономиканы кёрюмдюлерин эмда продукцияны качествосун игилендириуге уллу эс бурулгъанды. Ол заманда промышленностьну электротехника эмда приборла чыгъарыу дегенча аллай жангы бёлюмлери да къуралгъан эдиле. Машинала ишлеу, тау-металлургия, женгил эмда аш-азыкъла чыгъарыу бёлюмле да кюч алып башлагъандыла. Хайырланыугъа 34 жангы предприятие берилгенди эмда отузунда уа реконструкция ишле бардырылгъандыла.

Республиканы промышленностьда урунуу жетишимлери жылдан жылгъа аслам болуп баргъандыла. Сёз ючюн, 1962 жылда аллай продукцияны чыгъарыу, аны аллында жыл бла тенглешдиргенде, онбеш процентге кёбейген эди. Халкъ мюлк аслам кесек прибор, оборудование, кабель эмда электротехника затла, налмас инструмент, аякъ кийим, мебель, консерва, аш продукция бла жалчытылыннган эди.

Тарых шарт: «Искож» комбинатны биринчи кесегинде картон чыгъаргъан фабрика, ремонт этген мастерскойла, дагъыда котельня, электрокюч подстанция эмда суу-канализация объекти бар эдиле. Ала бары да 1960 жылда ишлеп башлагъандыла. Эки жылдан сора уа, (1962) сентябрьде, энчи (плащ) быстыр тикген фабрика къошулгъанды. Ызы бла, кёп да бармай, картон ызны тынгылы жарашдырып, анда чыгъарылгъан продукцияны качествосу бютюнда иги болурча этгендиле. Башха производстволада да иш алай къурала эди. Аланы кёплеринде аберини къол бла этиуден  башлагъандыла. Аякъ кийимлени производствосундан къалгъан-къулгъанланы да бошуна тёгюп къоймай, ууакъ тартып, картоннга къошуп, аны бла качествосун бек аламат этгендиле.

Улбашланы Мурат хазырлагъанды.