Бу кюнледе «Маяки дружбы, Россия сближает-2019» деген жаш тёлю проектге кёре Россейни кёп регионларындан жаш адамланы къаууму Къабарты-Малкъарны жокълагъанды. Ала он кюнню ичинде мында жашагъан халкъланы адет-тёрелери, маданиятлары, тарых эсгертмелери, табийгъатыбызны тамашалыкълары бла да шагъырейленнгендиле, бу жерли жаш тёлю бла бирге тийрелени тазалау ишлеге да къатышхандыла.
Кетер кюнлерини аллында уа алагъа «Настальжи» кафеде къонакъбайлыкъ этгендиле. Волонтёрла бла КъМР-ни граждан обществону институтлары бла байламлыкъла жюрютюу эмда миллетлени ишлери жаны бла министри Анзор Курашинов, ол ведомствону бёлюмюню таматасы Рахайланы Мурат, КъМР-ни Жарыкъландырыу, илму эм жаш тёлюню ишлери жаны бла министерствосуну Кёп функциялы жаш тёлю арасыны келечиси Ратмир Каров да тюбешгендиле.
Къонакъла хапарларын мында алдыргъан видеороликни кёргюзтюуден башлагъандыла, ызы бла хар бири да кеслерини оюмларын айтхандыла. Анзор Курашинов алагъа кеси башчылыкъ этген министерствону атындан саугъагъа республиканы юсюнден китап, буклетле да бергенди.
Ратмир Каров а Инна Кашежеваны Къулийланы Къайсыннга жоралагъан назмусун окъуп, поэтни жыйымдыгъын саугъалагъанды. Ахырында къызла, жашла да «Настальжи» ашханада миллет ашарыкъла къалай жарашдырылгъанларына къарагъандыла, кеслери да хычин этерге, эт туураргъа кюрешгендиле.
Мен да, къонакъла бла ушакъ эте, аладан мында не зат кёргенлерин, билгенлерин, эшитгенлерин соргъанма. Владислав Белянкин Къазахстандан келгенди. «Мында тургъан кюнлерим жомакъча кёрюннгендиле манга. Сёзсюз, дагъыда келмей къалмам. Биз Огъары Малкъаргъа барып, анда буруннгу заманладан къалгъан къалаланы да кёргенбиз, Минги таугъа канат жол бла 3450 метр бийикликге чыкъгъанбыз, Чегем чучхурлагъа, Чирик кёлге да баргъанбыз.
Къайры къарасанг да, тамашагъа къалдыргъан табийгъат. Хауа асыры тазадан башынг тёгерек айланады. Сууугъуз а бир татыулу. Къабарты-Малкъарны оноучуларына, энчи республиканы Башчысыны къуллугъун толтургъан Казбек Валерьевичге да, бизге жарыкъ тюбеген, жумушларыбызны тамамларгъа ашыкъгъан хар кимге да жюрек ыразылыгъымы билдиреме»,-дегенди.
Дана Агеева уа Москваданды, Нальчикде биринчи кереди. «Мени сейирим: къайры барсакъ да, олсагъат сыйлап башлай эдиле. Хар кимни да жюреги ачыкъды. Табийгъатыгъыз да бир аламат. Быллай жерде жашагъанла къалай насыплыладыла»,- дегенди. Ол Чегем чучхурланы тийресинде, Черек районда да кир-кипчикни жыйгъанларын да билдиргенди.
Лок Лан а Чувашиядан келгенди. Проектге къошулгъанына бек ыразыды. «Суратлада, телевизорда кёрген – бир, кесинг кёзюнг бла кёрген а башхады. Фотоаппарат ала келмегениме бек сокъуранама. Алай не аламат сурат да кёргюзталлыкъ тюйюлдю бу сиздеги ариулукъну. Къайтып келип, тау этекледе чатыр орнатып, бир ненча кюнню мында бек сюйюп турлукъ эдим. Юйюме келсем, шуёхларыма, танышларыма айтырыкъма сизде къалай аламат болгъанын»,- дегенди ол.
Москвадан Шахим Алиев а «Къайсыннга жюз атлам» мемориал комплекс аны сейирге къалдыргъанын, жюрегин бек къозгъагъанын айтып тауусалмай эди. «Интернетде да излегенме дунияны башында аллай зат болурму деп, тапмагъанма. Ол биринчиди. Аны бла ёхтемленирге боллукъсуз»,- дегенди.
Анастасия Старкова да къыралыбызны ара шахарынданды. «Ариу табийгъатыгъыздан, жарыкъ адамларыгъыздан айрыллыгъыбыз келмейди, энтта да къайтыргъа сюебиз»,- дегенди ол.
Къонакъланы ол кюн «Гитче жигит» сабий юлгюлю ансамбль да миллет тепсеулени кёргюзтюп къууандыргъанды.
