Кёп болмай КъМР-ни саулукъ сакълау министри Рустам Калибатов ишчи жолоучулугъуну  чеклеринде  "Саулукъ сакълау"  миллет проекге кирген "Саулукъ сакълауну биринчи звеносун игилендириу" регионал программагъа кёре,  Кёнделенде тынгылы ремонт этиле тургъан  амбулаторияда   болгъанды.  

Мекям  1963 жылда ишленнгенди, андан бери анга бир да тынгылы ремонт этилмегенди. Аны бла бирге жангы излемлеге да артыкъ келишмегенди. Энди жангыртыу ишледен сора, ол мардалагъа келиширча боллукъду. Бусагъатда ол эсепде болгъан алты мингден артыкъ адамгъа къарайды.

Алгъаракъда къурулуш организацияны келечилери аны терезелерин алышхандыла, ичин игилендирип башларча хазырлагъандыла, бюгюнлюкде уа инженер коммуникацияларын жарашдырып кюрешедиле. Ишлени кезиуюнде "Аяулу поликлиника" проектге  тийишлиликде  планировкасы да тюрленирикди. Аны баш магъанасы адамлагъа тап болурча онгла къураргъады. 

Министр кёргенине бюсюрегенди эм бир къауум шарт бла байламлы  Элбрус районну ара больницасыны баш  врачына Тилланы  Хабибуллахха  эсгертиуле да бергенди. Ол санда тынгылы материалла  хайырланырча эм ишле болжалдан  кеч къалмай   тамамланырча  эс бурулургъа кереклисин белгилегенди.

Эсге сала айтсакъ, планнга кёре, объект экинчи жылдан кеч къалмай хайырланыргъа берилирге керекди.