«Башланыуу.  Къабарты-Малкъарда  профессионал музыка искусствону айныууну тарыхындан» деп аталгъанды бу кюнледе  Искусстволаны Шимал-Кавказ  къырал институтуну  «АРТ-идея» арасында  ачылгъан сурат кёрмючге.

«Башланыуу.  Къабарты-Малкъарда  профессионал музыка искусствону айныууну тарыхындан» деп аталгъанды бу кюнледе  Искусстволаны Шимал-Кавказ  къырал институтуну  «АРТ-идея» арасында  ачылгъан сурат кёрмючге.

Аны СКГИИ-ни  фортепиано эмда методика  кафедрасыны профессору Бэлла Кокова эмда музыканы  тарыхы бла теориясыны кафедрасыны доценти Марианна Шериева  хазырлагъандыла. Ала бек уллу ишни къурап бардыргъандыла, нек дегенде алыкъа бир проектде да жыйышдырылып кёргюзтюлмегенди аллай бир сурат эмда документ.

Кёрмючде  Къабарты-Малкъарны Миллет музейини  архивлеринден суратла, республиканы  музыкалы школларыны, дагъыда Нальчикде  СКГИИ-ни  культура эм искусство колледжини, жырчыларыны, композиторларыны, биринчи тепсеу, художестволу коллективлени, элледе маданият мекямланы, алада къуралгъан коллективлени   суратларын да кёрюрге боллукъду.

Аны къурагъанла композитор Х.Кардановну, Б.Бленаованы, М.Хасановну эмда башхаланы, белгили жырчыларыбыз Таукенланы Галинаны, С.Богатыжеваны, М.Бекишевни, дагъыда башхаланы энчи архивлеринден материалланы да хайырланнгандыла.

Марианна Шериева кёрмючге къараргъа келгенлеге тюбеп, сейирлик шартла бла да шагъырейлендиргенди. «Мында республиканы культурасыны тарыхын кёрюрге, билирге боллукъду. Биз, шёндюгю  амалланы хайырланып, культураны тарыхыны бир кесегин жыйышдырыргъа кюрешгенбиз. Ол мында, арада, кёргюзтюлюу бла чекленип къаллыкъ тюйюлдю, республиканы районларыны Маданият юйлеринде да аны кёрюрге боллукъду», - дегенди ол.

Проект Россей Федерацияны Президентини грантына  бардырылгъанды.