Къабарты-Малкъар Республикада Социал страхование фондуну регион бёлюмюнде иш юсюнде ачыгъанлагъа автомобильле берилгендиле. Жангы «Лада-Гранта» машинала къоллу бу жол республикада жашагъан экеулен болгъандыла. Экиси да Черек райондандыла. Дагъыда Нальчикде жашагъан биреуленнге транспорт амалны ёз ырысхысына сатып алгъаны ючюн регион бёлюм ахча бергенди.
Автомобильле иелерини санларында къыяуларын эсге алып жарашдырылгъандыла. Энчи машинасы болургъа тийишли инсанны медицина-социал экспертиза этген учреждение кёргюзтеди. Ол битеу керекли документлеге, производствода ачыгъанны халине да тынгылы къарайды эмда реабилитация программаны жарашдырады.
-Улоу жети жылгъа бериледи. Андан сора да, фондну регион бёлюмю ол жылланы ичинде машинаны ремонтуна эмда жау-отлукъ материаллагъа иеси къоратхан эм дагъыда бир кере тынгылы ремонт этер ючюн да автомобильни багъасыны 30 процентине дери этген къоранчын къайтарлыкъды. Жети жыл озгъандан сора аны иеси жангы транспорт амал алырча заявление жазаргъа боллукъду. Аны энчи комиссия тийишли кёрсе, ол берилликди,- дегенди, автомобильледен ачхычланы иелерине бере, Социал страхование фондну регион бёлюмюню башчысыны орунбасарыны къуллугъун болжаллы халда толтура тургъан Мурат Кушхов.
Иш юсюнде ачыгъанлагъа Социал страхование фонддан бир жолгъа эмда ай сайын дарманлагъа, медицина жаны бла башха кереклеге деп болушлукъ, санатор-курорт багъыугъа путёвкала, реабилитация техника амалла, протез-ортопед затла да бериледиле.