СурэтыщI гъуазджэхэмкIэ музей Ткаченкэ Андрей и цIэр зезыхьэм иджыблагъэ къыщызэIуахащ Горлов Михаил и гъэлъэгъуэныгъэ, ар псэужамэ, илъэс 70 ирикъуну зэ­рыщытам теухуауэ къызэрагъэпэщар.

IуэхущIапIэм и унафэщI Ремхен Еленэ къызэрыхигъэщамкIэ, IэдакъэщIэкIыу щитIым нэблагъэ утыку кърахьащ, сурэтхэр, тхылъ графикэхэр, инсталяцэхэр, каллиграфие­хэр, езым и тхылъхэр зэригъэдэха лэжьыгъэхэр, нэгъуэщI куэди хэту. «Дэтхэнэми езым и псэм фIэфI, и          гум дыхьэ гъэлъэгъуэныгъэм къы­зэ­ры­щигъуэтынум шэч хэлъкъым», - жиIащ Еленэ. 
Япэ псалъэр иратащ КъБР-м щэнхабзэмкIэ и министрым и къуэдзэ Тау Ритэ. 
- СурэтыщI, график, тхылъхэр да­хэу зыгъэщIэращIэу щыта, усакIуэ Гор­-лов Михаил и фэеплъыр дгъэлъэ­пIэну, и IэрыкIхэр иджыри зэ зэдгъэ­лъагъуну дыкъыщызэхуэсащ музейм, - жиIащ абы. - Фэ фщыщхэм я нэхъыбэм яцIыхуу щытащ Михаил, куэдрэ гъэлъэгъуэныгъэхэм дыщрихьэлIэрт, езым и пшыхьхэми дыхэтт. Ахэр щыхьэт зэрытехъуэщи, Михаил цIыху Iущт, къыбжиIэн и куэдти, удэ­уэршэрыну гухэхъуэт. И IэщIагъэм хуэ­Iэижьу зэрыщытар наIуэ пщызыщI зэIущIэщ нобэрейр. Си гущIэм къыщагъэуш хуабагъэм, дахагъэм хуэ­дэкIэ фыфейхэри къулей ящIыну си гуапэщ мы лэжьыгъэхэм.
Къэбэрдей-Балъкъэрым и Парламентым ЩэнхабзэмкIэ, жылагъуэм и зыужьыныгъэмрэ хъыбарегъащIэ ­политикэмкIэ и комитетым и тхьэма­-дэ Текуев Амурбий къыхигъэщащ ­Горловым и гуащIэм фIы дыдэу зэ­рыщымыгъуазэр, ауэ утыку кърахьа IэдакъэщIэкIхэм зэратхьэкъуар. «И цIэ къраIуэу зэрызэхэсхымкIэ, и лэ­жьыгъэу си нэгу щIэкIхэмкIэ шэч ­къытезмыхьэу схужыIэнущ ар зи IэщIагъэм фIыуэ хэзыщIыкI цIыхуу зэрыщытар, гъуазджэм езым и лъа­гъуэ зэрыщыхишыжар, и лъэужь къы­зэрыхинар. И усэхэри щыхьэт тохъуэ зэрысурэтыщIыр имыгъэгъуащэу ад­рейхэм къащхьэщызыгъэкI гуп­сысэ­кIэ щхьэхуэ зэриIам», - жиIащ Текуевым. 
КъБР-м и СурэтыщIхэм я зэгухьэ­ныгъэм и унафэщI Къаныкъуэ Жан- нэ къыхигъэщащ мы гъэлъэгъуэныгъэр Горловыр щIэблэм ящымы­гъупщэн папщIэ тхуэщIэну мащIэм ящыщ зыуэ зэрыщытыр. ФIыщIэ яхуи­щIащ Михаил и гуащIэр хъумэным ­телажьэ, мы пшыхьыр къызэгъэ­пэ­щыным зи гуащIэ хэзылъхьа и щхьэгъусэ Надеждэ, и ныбжьэгъу пэжхэм, музейм и лэжьакIуэхэм. 
- Нобэ дэ дыхэтщ Михаил куэдрэ зыпэплъа и гъэлъэгъуэныгъэм. Ди жагъуэ зэрыхъунщи, илъэгъуакъым. Куэдрэ утыку кърихьащ абы и IэдакъэщIэкIхэр, ауэ жыпхъэ псомкIи щIа лэжьыгъэхэр мыпхуэдэу зэуIуу налшыкдэсхэмрэ абы и хьэщIэхэмрэ зэи ялъэгъуакъым. Сэ фIыуэ сцIыхут ­Горловыр: «Эль-Фа» тхылъ тедзапIэм незгъэблагъэри, илъэсихкIэ ды­зэ­дэ­лэжьащ, дгъэхьэзыр къыдэкIыгъуэ-хэр игъэщIэращIэу щытащ. Лэжьы­-гъэ куэдыкIей дунейм тетщ Михаил зэрейр ямыщIэу, я нэхъыфIхэри тхылъхэр зэригъэдэхахэм зэращы­щым щыхьэт сытехъуэфынущ. ЦIыху­хэр къепщIэкIырт Михаил, и гукъэкI гъэщIэгъуэнхэр зригъэхъулIэрт, хилъ­хьэрт и лэжьыгъэхэм, аращ ахэр нэхъри нэхъ телъыджэж зыщIар, - жиIащ тхакIуэ, уней тхылъ тедзапIэм и уна­фэщI Котляров Виктор.
Апхуэдэуи зэIущIэм къыщыпсэ­лъащ тхакIуэ, сценарист, журналист Терехов Игорь, КъБР-м и цIыхубэ сурэтыщI Колкутин Андрей, ХудожествэхэмкIэ Урысей академием щIыхь зиIэ и академик, КIыщ Мухьэдин и арт-директор Мосс Жаклин ­Дианэ сымэ. 
И щхьэгъусэ Горловэ Надеждэ жиIэн и куэдт. Ар тепсэлъыхьащ Ми­хаил и IэдакъэщIэкIхэм зэрыхущы­тым, и гуащIэр къызэрилъытэм, и цIыху щIыкIэм, зэуэзэпсэу зэрытхэкIыжам. Илъэс 45-кIэ зыдэпсэуа и щхьэгъусэм къигъэна щIэиныр нэсу зыхэзыщIэ бзылъхугъэм фIыщIэ яхуи­щIащ гъэлъэгъуэныгъэм зыкърезыгъэхьэлIахэм, ар къызэгъэпэщыным зи гуащIэ хэзылъхьахэм, пэжкIэ Ми­хаил бгъэдэта, ноби и фэеплъыр зыхъумэ и ныбжьэгъуфIхэм. 
Къэпсэлъахэм жаIар ди гъуазэу, Горловым и IэдакъэщIэкIхэм иджыри зэ дахоплъэж. Музейм и пэшхэр яуфэбгъуащ Горловым и IэдакъэщIэкI купщIафIэхэм. Къэпсэлъахэм къызэ­рыхагъэщащи, абыхэм яхэплъэгъуэнущ жыпхъэ зэмылIэужьыгъуэхэр,  ауэ дэтхэнэми сурэтыщIым и псэ зэ­рыхилъхьар къапщIэу хэти хуабэщ, ­гуапэщ, хэти гуныкъуэгъуэр къыпхыщу нэщхъейщ. ТIум хуэдэхэри плъы­фэбэщ, а плъыфэхэм я зэхэлъхьэ­кIэращ зи гугъу тщIы псэкупсэ щы­тыкIэр зыубзыхур. Горловыр зыцIыхуу щытахэм сащыщщ сэри, гущIыхьэ тщыхъуат зэчиишхуэ зыбгъэдэлъ лIы узыншэр ковид уз зэрыцIалэм 2021 гъэм щихьам, и къару илъыгъуэу, зэуэзэпсэу. Куэд къэнащ абы хузэ­фIэ­кIыну щытауэ, и щхьэгъусэми зэрыжиIащи, сурэт щIыным и мызакъуэу, къурш лъагэхэм дэкIын хъуэпсапIэри щIыгъужу. 

БЛИЙ  Даянэ. 
Сурэтхэр  Къарей Элинэ  трихащ.