КъМР-ни Транспорт эмда жол мюлк министерствосундан билдиргенлерича, "Къоркъуусуз эм тынгылы автомобиль жолла" миллет проектни чеклеринде жоллагъа тынгылы ремонт къалай этилгенине жамауат организацияланы келечилери  ведомствону специалистлери бла бирге  дайым мониторинг этгенлей турадыла.

Алай бла  сагъынылгъан министерствону жамауат советини келечилери республиканы Жол управлениясыны специалистлери бла бирге Нальчикде тынгылы ремонт ишле баргъан эм алгъаракъда тамамланнган объектлени жокълагъандыла. Ол санда Юность орамда да болгъандыла.

Мында медицина ара, спорт майдан,12,-чи,  27-чи номерли  мектепле, 5-чи номерли сабий сад, Хорламны 45-жыллыгъа аталгъан эсгертме дегенча аслам социал магъаналы объект орналады. 
Пoдpяд opгaнизaцияны кючю бла   орамда комплекс халда уллу иш этилгенди. Аны чеклеринде жолну кенгертгендиле, асфальт жайгъандыла,  тротуарланы жангыртхандыла, бордюрла   салгъандыла эм башха жумушла да тамамланнгандыла.
Ишле баргъан кезиуде Жол мюлк управленияны  лабораториясында хайырланнган материалланы игилиги тинтилгенди эм жангы технологиялалгъа келиширлерине эс бурулгъанды. 

- Жангыртылгъан тротуарланы, "зебраланы" хайырындан энди садикге  эм школгъа баргъанла да   жолда  къоркъуусуз жюрюяллыкъдыла. Машиналада эм  жаяу жюрюгенлеге  аламат онгла къуралгъанлары кёплени ыразы этерчады. Болсада келир заманда  Дзержинский орамдача машинала тынч жюрюрча чек салынса бютюнда иги боллукъ эди,- дейди ОНФ-ни Къабарты-Малкъарда келечиси  Анзор Тхамоков.