Россей Федерацияны тамата прокуроруну орунбасары Дмитрий Демешин Нальчикде КъМР-ни Прокуратурасыны коллективин жангы оноучу – Николай Хабаров бла танышдыргъанды. Ол бу къуллукъгъа Россей Федерацияны Президентини Указы бла салыннганды. Жыйылыугъа Къабарты-Малкъарны Башчысыны къуллугъун болжаллы халда толтургъан Казбек Коков, КъМР-де баш федерал инспектор Тимур Макоев, КъМР-ни Парламентини председатели Татьяна Егорова, КъМР-де РФ-ни УФСБ-ны, КъМР-де РФ-ни МВД-сыны, КъМР-де РФ-ни СК-ны СУ-ну оноучулары да къатышхандыла.
Казбек Коков сёзюнде Николай Хабаровха ишинде жетишимле тежеп,аны сынамы бла профессионаллыгъы республикада жашагъанланы игилигине къуллукъ этериклерине ийнаннганын белгилегенди. «Сизге ышанабыз. Ишибиз бирди, Россей Федерацияны Президенти белгилеген борчланы тындырыуда толтуруучу власть органланы жанындан биз сизге керекли билекликни этерикбиз», - дегенди.
Николай Алексеевич Хабаров Саратовда Къырал право академияны тауусханды. Прокуратура органлада ишлеп 1994 жылда башлагъанды. Великие Луки шахарны, Псков областьда Пустошкинский эм Великолукский районланы прокуратураларында тамата следователь, Чечен Республиканы прокуроруну биринчи орунбасары болуп уруннганды.
Ол «Россей Федерацияны прокуратурасыны сыйлы къуллукъчусу» атха тийишли болгъанды, «Ата журтну аллында къыйыны ючюн» 2-чи даражалы орден, «Россей Федерацияны прокуратурасыны сыйлы ишчиси», «За безупречную службу» деген кёкюрекге тагъылгъан белгиле, «Законнга кертичилиги ючюн» биринчи даражалы айырмалы белги бла саугъаланнганды.