Кёп болмай Къабарты-Малкъарны предпринимательлери Беларусь Республикада болгъандыла. Ол жолоучулукъ «Экспортха болушлукъ тапдырыу» бла "Мени бизнесим" араланы башламчылыкълары бла бардырылгъанды. Аны магъанасы республиканы гитче эм орта бизнесини келечилерине тыш къыралла бла байламлыкъ къураргъа болушургъа эм продукцияларын сатаргъа болушургъады, деп билдиргендиле КъМР-ни Экономиканы айнытыу министерствосуну пресс-службасындан.
Жолоучулукъ юч кюннге созуллукъду. Аны чеклеринде эки къауум да байламлыкъ къурарча, продукцияларын сатарча онгланы сюзерикдиле эм бир бирге сынамларындан билдирликдиле.
- Бизнесни айнытыу, байламлыкъла къураргъа жангы рыноклагъа чыгъаргъа онг береди. Ишчи программагъа кёре, биз бизнес-миссияны тийишли халда бардырыргъа болушабыз. Жерлешлерибиз Белоруссияны рыногуну болуму бла шагъырейленедиле, сатыу-алыу бла байламлы законодательствогъа эм налогла жаны бла политикагъа да эс бурадыла,- дегенди Къабарты-Малкъарда «Экспортха болушуу араны» специалисти Къулбайланы Марат.
Ол айтханнга кёре, тюбешиуню кезиуюнде эки къауум да бир бирини къыйматлы проектлери бла шагъырей болаллыкъдыла, оюмларын билдираллыкъдыла. Беларусь Республика Россейни, ол санда Къабарты-Малкъарны да стратегиялы партнёру болгъанын эсге алсакъ, эс бурурча бёлюмле иги кесек бардыла.
Бу жол делегатла, шуёх республиканы бизнесменлери бла тюбешгенлеринден сора да, профильлерине кёре предприятиялада болуп, ишлерине къараргъа эм таматалары бла бетден-бетге тюбешиуле ётдюрюрге да онг тапхандыла.
Эсге сала айтсакъ, тюбешиу "Гитче эм орта предпринимательствогъа болушлукъ тапдырыу" миллет проектге кёре, КъМР-ни Экономиканы айнытыу министерствосу болушуп бардырылады.
Бизни корр.
