Урысей Федерацэм и Прокурор Нэхъыщхьэм и къуэдзэ Демешин Дмитрий КъБР-м и прокуратурэм щылажьэхэм иджыблагъэ яригъэцIыхуащ Урысей Федерацэм и Президент Путин Владимир а IуэхущIапIэм и унафэщIу игъэува Хабаров Николай.
ЗэIущIэм кърихьэлIащ Къэбэрдей-Балъкъэр Республикэм и Iэтащхьэм и ­къалэнхэр пIалъэкIэ зыгъэзащIэ КIуэ­кIуэ Казбек, КъБР-м егъэщIылIа федеральнэ инспектор нэхъыщхьэ Мэкъуауэ Тимур, КъБР-м и Парламентым и УнафэщI Егоровэ Татьянэ, ШынагъуэншагъэмкIэ федеральнэ къулыкъущIапIэм и управленэу КъБР-м щыIэм, КъБР-м щыIэ МВД-м, УФ-м СледствиемкIэ и комитетым СледствиемкIэ и управленэу КъБР-м щыIэм я унафэщIхэр.
КIуэкIуэ Казбек зыпэрыува лэжьыгъэхэм ехъулIэныгъэ къыщихьыну Хабаров Николай ехъуэхъуащ икIи абы бгъэдэлъ щIэныгъэмрэ зэфIэкIымрэ республикэм щып­сэухэм я сэбэп хэлъу къызэригъэсэбэпынур и фIэщ зэрыхъур къыхигъэщхьэхукIащ. «Уэ дзыхьышхуэ къыпхуащIащ. Дэ псоми ди къалэныр зыщ икIи властым ­и гъэзэщIакIуэ ор­ганхэр зэрахузэфIэкIкIэ къызэрыбдэIэ­пы­къунумкIэ, Урысей Федерацэм и ­Президентым къигъэува къалэнхэр дэгъэ­кIыным хуэгъэзауэ зэры­зы­къыт­щIагъэкъуэ­нымкIэ быдэу узогъэгугъэ», - къыхигъэщхьэхукIащ абы.
Хабаров Николай Алексей и къуэм Саратов къалэм дэт къэрал академиер ­къиухащ. Прокуратурэм и органхэм ­къулыкъу щищIэу хуежьащ 1994 гъэм. Псков областым хыхьэ Великие Луки ­къалэм, Пустошкинскэ, Великолускэ ­районхэм я прокуратурэхэм я следова­тель нэхъыжьу, Шэшэн Республикэм и прокурорым и япэ къуэдзэу лэжьащ.
«Урысей Федерацэм и прокуратурэм щIыхь зиIэ и лэжьакIуэ» цIэр къыфIащащ, «Хэкум и пащхьэм щиIэ фIыщIэхэм ­папщIэ» орденым и етIуанэ нагъыщэр зиIэ медалыр, «Урысей Федерацэм и прокуратурэм пщIэ зиIэ и лэжьакIуэ», «Да­гъуэншэу къулыкъум зэрыпэрытым папщIэ» бгъэхэIу дамыгъэхэр, «Законым зэ­рыхуэпэжым папщIэ» дамыгъэм и япэ нагъыщэр къратащ.