Орус география биригиуню  жаш тёлюню къымылдаууну келечилерин Лячинкъаяны тийресинде къаялагъа ёрлерге юйретгендиле. 
Альпинизмни жашырынлыкъларына аланы биригиуню Жаш тёлю арасыны башчысы Мокъаланы Тенгиз бла таулагъа ёрлеуден инструктор Адам Казанчев тюшюндюргендиле. Ала жаш адамлагъа  эм алгъа  къоркъуусузлукъну жорукъларын эсгертгендиле, андан сора жыйылгъанла къыйынлыкъларына кёре алтынчы къауумгъа кирген юч жолгъа ётерге керек болгъандыла. Жаш адамланы асламысы аланы тийишлисича баргъандыла. Кёпле бу сынауланы керти табийгъатда биринчи кере ётгенлерин да белгилерге керекди.
Мокъаланы Тенгиз айтханыча, Лячинкъаяны  скалодромунда арт 15 жылны ичинде  онла бла саналгъан тик жол ишленнгенди, алада бийикликле 50 метрге дери жетедиле, 70-ден аслам жол «боулдеринг» къауумгъа киредиле. Былайны дагъыда бир энчилиги – аслам къая ыран болгъанындады. Аны хайыры бла таулагъа ёрлеуню энчи тюрлюлери бла кюреширге онг барды. Таулагъа ёрлеу сабийлени бла акъылбалыкъ болмагъанланы кюч-къарыу, акъыл жаны бла да айнырларына уллу себеплик этеди, деп белгилейди ол.    
Алай бла окъуу жылны аллындан башлап гитчелени Нальчикни скалодромларында ёрлеуге юйретедиле. Тенгиз билдиргенича, алагъа сынамлы, спортну бу тюрлюсю бла энди кюрешип башлагъанла да келедиле. Сууукъла башланнганчы ,аланы табийгъатха да ала керти болумлада сынам жыярча элтгендиле. «Къаяны башындан тартылгъан жипден тутуп ёрлеу дагъыда кёп жаны бла билим излейди, ол санда карабинле, энишге тюшгенде тюрлю-тюрлю снаряженияны хайырланыуну да. Залда жарау этгенде, инсан анда илинирча затлагъа, тынч болумлагъа юйренип къалады, ачыкъ хауада, керти табийгъатда уа хар не да башхача сезиледи», - деп къошады ол. 
Таулагъа ёрлеуден юйретиу декабрьны ахырында болуучу эришиу бла бошаллыкъды, ол Къутхарыучуну кюнюне аталып бардырыллыкъды. 
ХАБИБУЛЛАХЛАНЫ Зульфия.