КъБР-м и Iэтащхьэ КIуэкIуэ Казбек яхуэ­защ Налшык щрагъэжьа «Команда управления КБР. Проводники изменений» япэ модуль практикэ программэм хэтхэм.

Программэр илъэс етIуанэ хъуауэ «Эльбрус» университетым егъэзащIэ, хэгъэгу, щIыналъэ къулыкъущIапIэхэм я лIы­кIуэхэу кадр къэпщытэныгъэхэмрэ зэпеуэ­хэмрэ хэтахэм папщIэ.
Республикэм и УнафэщIым зэхыхьэм хэтхэм защыхуигъазэм къыхигъэщащ IэщIагъэлIхэр нэхъ щхьэпэ щыхъуну IэнатIэхэр убзыхунымкIэ апхуэдэ семинархэр сэбэп зэ­рыхъур. «А Iуэхум адэкIи зэрызедгъэу­жьы­ным, нэхъыбэ къызэрызэщIедгъэубыдэ­-ным жыджэру иужь дитынущ. ЦIыхубэм я Iуэху дэгъэкIыныр къалэн щызыхуэтщIыжкIэ, абы къытхуигъэув лэжьыгъэр нэсу гъэ­зэщIэнымкIэ къэралым, дуней псом къы­-дит Iэмал псори къэгъэсэбэпыпхъэщ. Шэч къытесхьэркъым нобэрей зэхыхьэр, фи зэ­пыщIэныгъэхэр Къэбэрдей-Балъкъэрым и зэIузэпэщыгъэм папщIэ евгъэкIуэкI лэжьыгъэмкIэ щхьэпэ зэрыхъунум», - жиIащ КIуэ­кIуэ Казбек.
«Команда КБР» программэм и къалэныр къэрал, муниципальнэ къулыкъущIэхэм ­социально-ээкономикэ унэтIыныгъэ псомкIи я Iэзагъым, зэфIэкIым хэгъэхъуэнырщ, IэщIагъэлI нэсхэр гъэхьэзырынырщ. 
Мы гъэм программэм хэтщ цIыху 60. Ахэр я лIыкIуэщ министерствэ 14-м, ведомстви 3-м, муниципалитети 8-м. Гупым ядолажьэ къэралым и IэщIагъэлI пажэхэр, методолог цIэрыIуэхэр, инновацэ проектхэм я уна­фэщIхэр. Абыхэм яхэтщ урысей инвестор, хьэрычэтыщIэ Орловский Виктор, апхуэдэу Урысей экспорт центрым и хэщIапIэу Санкт-Петербург щыIэм и унафэщI Миронов ­Андрей, нэгъуэщIхэри.
КъБР-м и Iэтащхьэр программэм хэтхэм ехъуэхъуащ ехъулIэныгъэ яIэну, апхуэдэуи еджэныгъэр езыгъэкIуэкI хьэщIэхэм фIы­щIэ яхуищIащ Къэбэрдей-Балъкъэрым ­къазэрыхуеблэгъам папщIэ.