Элбрус тау-лыжа курортха элтген «Прохладный – Бахсан – Элбрус» А-158 автомобиль  жол  къышха хазырды.  Аны,  Элбрус бла Бахсан районлада жашагъанладан тышында, туристле да тири  хайырланадыла.  Саулай алып айтханда, кюн сайын былайтын он минг чакълы машина жюрюйдю. 

Алай бла федарал  жолчула къыш кезиуге   этилирге   тийишли жумушланы тамамлагъандыла. Ол санда жерни бузлатмазча   туз къатыш юзмезден  20 минг тонна къыстырыкъ этгендиле.  Аны бла бирге бек сууукълада элли процент тузлу  раствор да чачарча мадар этилгенди.  

Жолну  сагъынылгъан кесегинде 25 энчи техника ишлерикди. Ишле оператив халда  эм тынгылы бардырылыр ючюн  аланы хар бири  «ГЛОНАСС»-ны  мурдорунда навигация-диспетчер   байламлыкъгъа къошулгъандыла. Кече-кюн демей элли адам,  къауумлагъа  юлешинип, дежурство бардырлыкъдыла.  Ала жолланы, тротуарланы, улоу тохтагъан жерлени, машинала сюелген майданланы   къардан тазаларыкъдыла. Андан сора да, жолла бузламазча эм къар юзюлюп чырмау салмазча да  жумушлагъа къарарыкъдыла.

Эсге сала айтсакъ, автомашина жоллагъа къарагъан  «Кавказ»  управлениясы, «Гидрометеорология эм тёгерекдеги къудуретге  кёз-къулакъ болуп туруу»   управление,  МЧС-ни бла  ГИБДД-ни бёлюмлери бла   байламлыкъда кече, кюн да тинтиуле  бардырлыкъдыла.

Росавтодорну  «исси  ызына» бу телефон номер бла сёлеширге боллукъду:  +7(8793) 33-11-59.

Магометланы Суклейман хазырлагъанды.