Урысей МВД-м и Управленэу Налшык къалэм щыIэм къыIэрыхьащ щыпIэм щыпсэу цIыхубзым  полицэм и участковэ уполномоченнэ, полицэм и лейтенант нэхъыжь Ахъмэт Руслан фIыщIэ зэрыхуищI тхыгъэ гуапэ.

Абы зэритхымкIэ,  2024 гъэм и шыщхьэуIу пщыхьэщхьэу, илъэси 3, 5 зи ныбжь сабиитIымрэ, я Iыхьлы щIалэ цIыкIу илъэси 5 хъумрэ  я пщIантIэм щыджэгухэрт. Зэман гуэр дэкIауэ цIыхубзым ахэр пщIантIэм зэрыдэмытым гу лъитэри, зэман щагъакIуэ хабзэ я гъунэгъухэмрэ благъэхэмрэ я деж кIуащ.  АрщхьэкIэ, щыIэтэкъым. Арати, занщIэу полицэм псэлъащ. Сабийхэр къэлъыхъуэ щIадзащ балигъ мыхъуахэм я IуэхухэмкIэ инспекторым, бзылъхугъэм и гъунэгъухэмрэ Iыхьлыхэмрэ.

Налшык УМВД-м полицэм и участковэ Ахъмэт Руслан пщыхьэщхьэр хэкIэсауэ лэжьапIэм къикIыжырт. Абы гъуэгубгъум, зы километркIэ псэупIэхэм япэщIэм деж, гу щалъитащ, балигъ зыщIымыгъу сабиищым. Полицэр абыхэм ябгъэдыхьащ.  ЦIыкIухэр шынати, упщIэхэм жэуап къратыфыртэкъым.   Руслан сабийхэм я Iэр иубыдри, лъэсу ежьащ щIыпIэм нэхъ пэгъунэгъу лъэныкъуэмкIэ щыIэ хьэблэм.

Гъуэгум абыхэм къащыхуэзащ щIалэ цIыкIухэм язым и адэр, и машинэм ису къакIуэр. И къуэмрэ и благъэ сабиитIымрэ полицэр ящIыгъуу щилъагъум ар къэувыIащ, зыкъригъэцIыхуащ, адрей цIыкIуитIыр щыпсэур жриIащ. 

Урысей МВД-м и Управленэу Налшык къалэм щыIэм   полицэм и участковэ уполномоченнэ, полицэм и лейтенант нэхъыжь Ахъмэт Руслан сабийхэр яIэригъэхьэжащ адэ-анэмрэ Iыхьлыхэмрэ. Ахэр сыхьэтым къриубыдэу  къагъуэтыжами, адэ-анэм ъагузэвам ущIэмыупщIэ жыхуиIэращ.

- ФIыщIэшхуэ хуэсщIыну сыхуейт Руслан и гулъытэ зэрыхэлъым папщIэ. ар зэрынабдзэгубдзаплъэр щапхъэщ икIи щытхъу щIыхуэфащэщ , - щыжеIэ цIыхубзым и тхыгъэм.

БАХЪСЭН Азэмэт.