24 сентября, 2019 - 07:38
Бу кюнледе фахмулу спортчуларыбыз Занкишиланы Казбек бла Мусукаланы Исмайыл артыкъда даражалы эришиуледе алчыла болгъанлары белгили этилгенди.
Алай бла эркин тутушуудан дунияны чемпионатында Мусукаланы Исмайыл (65 килограмм ауурлукъгъа дери) доммакъ майдал къытып, 2020 жылда Токиода Олимпиада оюнлагъа къатышыргъа эркинлик алгъанды. Бу эришиуле уа Къазахстанны ара шахары Нур-Султанда бардырылгъандыла. Анга 140 спортчу къатышхандыла, ол санда тиширыула да.
Бюгюнлюкде Исмайыл Венгрия жанлы тутушханын айтырчады. Ол спортну сюйгенлеге анга ышаныулукъ ючюн ыразылыгъын айта, бу эришиуле анга артыкъда магъаналы болгъанларын белгилегенди. «Анда Олимпиада оюнлагъа путёвкала берилгендиле. Бу жетишимимде Аллахутала болушханды. Венгрияда манга берилген онг ючюн ыразылыгъымы айтыргъа сюеме»,-деп жазгъанды ол Интернетде.
20 сентябрьде уа Узбекистанда дзюдодан Ташкентни Гран-прии башланнганды. Ол IJF Wold Judo Tour даражалы эришиулени кезиулю бёлюмю болгъанын айтырчады. Анга дунияны 73 къыралындан 467 спортчу къатышханды, ол санда Россейден 20 дзюдочу баргъанды. Аланы арасында бизни фахмулу жашыбыз Занкишиланы Казбек, кесини ауурлугъунда бир адамгъа да ал бермей, Гран-приге тийишли болгъанды.