Нальчикде Жаш тёлюню бла сабийлени чыгъармачылыкъларыны юйюнде миллет тилледе назму окъугъанланы республикалы эришиулери ётгенди. Анга жыл санлары 14-ден башлап 35-ге дери жетгенле къатышхандыла. Аланы хунерликлерине багъа бичгенлени къауумунда уа КъМР-ни маданият министрини экинчиси Рита Таова, КъМР-ни Муслийманларыны дин управлениясыны башчысыны орунбасары Алим Сижажев, Россейни Битеулю билим бериуюню сыйлы къуллукъчусу, малкъар тилден, адабиятдан устаз Чеченланы Ариужан да болгъандыла. Алагъа журналист, жазыучу Османланы Хыйса башчылыкъ этгенди.

Эришиу юч тилде бардырыла эди – малкъар, къабарты, орус. Малкъар тилден назмула окъугъанланы араларында Къашхатаудан, Тёбен Чегемден, Тырныаууздан, Нальчикден да келгенле бар эдиле. Ариу  кийинип келген тизгинли сабийле, бири бирин алыша, ана тиллеринде назмуланы шатык  окъудула.  Мечиланы Кязимни, Къулийланы Къайсынны, Мусукаланы Сакинатны, Ахматланы Сафариятны, Додуланы Аскерни чыгъармаларын эшитдирдиле.

Сабийле назмула окъугъан кезиуде ала бу ишге иги кёл салып хазырланнганлары кёрюнюп тура эди. Алагъа къарай, устазла да къыйын салгъанлары билине эди.

Биринчи чыкъгъанла бираз абызырагъан эдиле, болсада, эс жыйып, игиден-иги айтып тебирегендиле. Экинчи Чегемден Байдаланы Изабелла, Тёбен Чегемден Толгъурланы Камилла, Тырныаууздан Эфендиланы Жамиля  бир кере да ажашмай айтдыла назмуланы кёлден.

Эфендиланы Жамиляны уа атасы, анасы, эгечи, гитче къарындашы окъуна келген эдиле аны назму окъугъанына къараргъа.
Ахырында Къашхатауну мектебини окъуучусу Цепишланы Эльвира чыкъды. Ол Кязимни «Тарыгъыуу» деген назмусун айтханда, отоуда адамланы кёллери окъуна толгъан эди.
Назмулагъа тынгылай, къаллай ариу, бай тилибиз барды, деригим келди. Сора Созайланы Ахматны тилни юсюнден айтхан сёзлери тюшдюле эсиме:

Минги тауча бийик тилим,
Бир-бирлеге кийик тилим.
Ёмюрлю бол, ана тилим,
Кязим тилим, Къайсын тилим!

Назмуланы иги айтханла кёп болгъандан, жюриге эм игилерин сайларгъа къыйын эди. Болсада бир къауумунда тохтадыла. Биринчи жерге Цепишланы Эльвира тийишли болду. Экинчи жер Эфендиланы Жамилягъа жетди. Ючюнчю жерге уа Толгъурланы Камилла тийишли болду.

Аладан сора да, назмуланы иги окъугъан сабийлени бир къауумуна белгили къабартылы поэт Алим Кешоковну назму китаплары берилгендиле.   

Лейлун улу Х.