Улоу бла быллай жолну бирси жанына ётгенде авариягъа тюшмез ючюн водительле бек сакъ болургъа керекдиле. Эм биринчиден, аллай жерге жете туруп, тынчыракъ барып башлагъыз. Бирси жанына жаланда шлагбаум кётюрюлюп, сигнализация да ёчюлюп тура эсе, ётерге жарайды. Алай шлагбаум ачылып, экинчисини уа чыракълары жана неда ол таууш эте тура эсе уа, жолну бирси жанына барыргъа чек салынады. Къалай-алай болса да, аллай жерледе бек сакъ болугъуз.

Аварияла асламысында дежурный болмагъан жерледе, водительле уллу кёллюлюк этип, поездни аллы бла чартлап ётерге ашыкъсала болуучудула. Кёпле билмейдиле неда эслеринде тутмайдыла ансы, поезд алай терк тохтаяллыкъ тюйюлдю. Ол бек ауур техникады, не къаты тыяргъа кюрешгенде окъуна бир километр чакълы ётерге боллукъду. Жолда заманларын талай такъыйкъагъа къысхартыргъа кюрешген водительле уа къуру кеслерин  угъай, поездде баргъанланы жашауларына да къоркъуу саладыла.

Шлагбаум бла сигнализация болмагъан жерле уа бютюнда къоркъуулудула. Кечегиде, жауун неда къар жауа тургъанда, туман басханда да уллу сакълыкъ керекди. Темир жолда не къысха заманнга да тохтаргъа жарамайды. Улоу бузулуп неда башха чурум болуп алайда тыйылса, водитель аны ичиндегилени олсагъат тышына чыгъарып, бир жанына элтирге борчлуду. Ызы бла машинаны алайдан тюртюп неда тартып кетерирге ашыгъыргъа керекди.

Переездни къоркъуусуз ётерча адам сакъ эмда эсли болургъа, кеси да жоллада жюрюуню жорукъларындан чыкъмазгъа керекди. Уллу кёллюлюк уллу хата бла келирге боллукъду, аны унутургъа жарамайды.

Омарланы Мурат хазырлагъанды.