Жашларыбыз бла къызларыбыз бийик окъуу юйлени айырмалы бошагъанлары бла бизни кёллендиргенлей келедиле. Быйыл КъМКъУ-ну менеджмент, туризм эмда къонакъбайлыкъны индустриясы институтуну «Къонакъбайлыкъ» ызын онбеш адам тауусханды.

Къызыл дипломлагъа уа алтаулан тийишли болгъандыла. Аладан тёртюсю таулу сабийле болгъанларын да белгилерчады. Гузеланы Гульнара да аланы санындады.

Гульнара Огъары Жемталада устазны юйюрюнде ёсгенди. Анасы Фатима Владимировна математикадан бла физикадан окъутады, андан сора да, мектепде директорну орунбасарыды.

Аппасы Юсюп да кёп жылланы жаш тёлюню орус тилни бла адабиятны жашырынлыкъларына, сейирлигине да тюшюндюрюп тургъанды. Энди бюгюнлюкде анга 84 жыл толгъан эсе да, китапланы окъугъанлай турады. Юйде ахшы китапханасы да барды, болсада жангыларын сатып алыргъа, алагъа къошаргъа да сюеди.

Баям, Гульнара да школда бирсиледен эсе орус тилни бла адабиятны дерслерин бегирек аны ючюн жаратханды. Кеси уа устазы Бегийланы Светланагъа ол жаны бла ыразылыгъын билдире: «Аны дерслеринде солугъан этгенме, ол аланы алай бере эди–илхамы, учунуулугъу бла да! Анга солууунгу тыйып, алай тынгыларыгъынг келе эди», - дейди.

Ол школну бошагъан кезиу пандемияны заманы эди, алай эсе да, аны алтын майдалгъа тауусуп, тарыхдан, обществоведениядан, орус тилден сынауларын бийик баллагъа бергенди. Аны себеплиги бла университетни бюджет бёлюмюне окъуугъа киргенди. Мектеплени айырмалы тауусханла, медицинаны, экономиканы неда юристлени хазырлагъан ызны бегирек сайлагъанча кёрюнеди. Алай эсе да, жаш тёлю жашауда излемлени да ёзгере баргъанларын ангылай, кеслерине артда иш да табарча, жетишимли да болурча усталыкъланы айырадыла. Гузеланы къызчыкълары да жюрегини излемине кёре сайлагъанды кесине окъууну.

Алай эсе да, инсан ёз эркинликлери къаллайла болургъа кереклисин толусунлай билирге тийишлисине ийнанып, юристлени хазырлагъан бёлюмде да заочно окъуй турады. Андан тышында да, программистге юйренеди. Бу жаны бла ангылауунг къайсы усталыкъда да артыкъ боллукъ тюйюлдю, дейди.

Тёртюнчю курсда окъуй тургъанында, студент тенглери бла Нальчикде «Гранд Кавказ» отельге практикагъа жюрюгенди. Аны берилген жумушха къалай жууаплы болгъанын жаратып, практикадан сора стажировкагъа къалырын излегендиле. Алай бла бир кесекден Гульнара анда ишге да тохташханды. Дерслеринден бош заманында ары жюрюп тургъанды. Бюгюнлюкде сагъынылгъан отельде администраторду.

Аны тил билимге да барды хунери. Ана тилибизден сора да, къабартыча, ингилизча да иги сёлешеди. Башха тыш къыраллы тиллени билирге да итинеди, нек дегенде бирси жерледен республикагъа кёпле келедиле. Ала бла кеслерича сёлеше билгеннге уа, ишинде ол ахшы себеплик этеди.

Аны бирси тыш къыраллагъа барып, алада отельледе иш къалай къуралгъанын кёрюрге, ахшы сынамларына юйренирге умуту да барды. Мураты толса, кеси да отель ачар акъылдады. Анда уа миллет энчиликлени хайырланыргъа, ачыкъларгъа талпынады.

- Адамланы бек сюеме, бютюнда ала бла ушакъла бардырыргъа, хар неге кёз къарамларын билирге. Бизни республикабызгъа келгенле табийгъатыбызны, аш-сууубузну, адет-тёрелерибизни, къонакъбайлыгъыбызны жаратханларын айтадыла. Кёпле уа биринчи кере келедиле, хар небизге да сейирсиннгенлерин, быллай жерле, аны бла бирге уа таматалагъа, къонакълагъа хурметни аллай даражада болгъанын билмегенлерин да жашырмайдыла, дагъыда къайтып келирге излегенлерин да, - дейди кеси уа бизни бла ушагъында.

Кертиди, жашауну къайсы бёлюмюнде да иш кёллю, хунерли да жаш тёлюбюз барды. Ала, окъууда айырмалы болгъанларыча, бардыргъан жумушларында да жетишимли болурла деп да ышанабыз.

ТРАМЛАНЫ Зухура.