Налшык дэт Лъэпкъ музейм иджыб­лагъэ къыщызэIуахащ «Мо­заи­ки Юга России» зыфIаща гъэ­лъэгъуэныгъэ гъэщIэгъуэн. 
ЗэIущIэм хэтащ КъБР-м щэнхабзэмкIэ и министрым и къуэдзэ Кар­чае­вэ Iэминэ, ди республикэм и Парламентым ЕгъэджэныгъэмкIэ, щIэ­ны­гъэм­кIэ, физкультурэмкIэ, спортымрэ щIалэгъуалэм я IуэхухэмкIэ и комитетым и унафэщI Емуз Нинэ, Къэбэрдей-Балъкъэрым и Парламентым Щэн­хабзэмкIэ, жылагъуэм и зыужьы­ныгъэмрэ хъыбарегъащIэ политикэмкIэ и комитетым и тхьэмадэ Текуев Амурбий, «Кучково поле Музеон» тхылъ тедзапIэм и редактор нэхъыщ­хьэ Кучков Георгий сымэ, къалэм щыпсэухэмрэ абы и хьэщIэхэмрэ. 
Къэпсэлъа псоми зы жьэу жаIащ мывэкIэщхъхэр, абдж зэмыфэгъухэр зэхагъэувэурэ къагъэщI сурэтхэр, тхыпхъэщIыпхъэхэр гъуазджэм и лIэу­жьыгъуэ гъэщIэгъуэну зэры­щы­тыр, я нэхъ гугъууи къызэралъытэр. Музейм и пэшым щалъагъу псом зэрыщIэщыгъуэр, мы гъуазджэ лIэу­жьыгъуэр щIэх-щIэ­хыурэ утыку къихьэн, цIыху нэхъыбэм егъэлъагъун зэрыхуейри къыхагъэщащ. 
Гъэлъэгъуэныгъэм и хьэщIэ лъапIэт сурэтыщI, монументальнэ мозаикэ­хэр зи IэдакъэщIэкI Ездэч Владимир. Абы иратащ Къэбэрдей-Балкъэр Республикэм ЩэнхабзэмкIэ и минис­терст­вэм и ЩIыхь тхылъыр, сурэтыщI гъуазджэм хуищIа хэлъхьэныгъэш­хуэм папщIэ. 
Гъэлъэгъуэныгъэр къызэрызэIуах пэублэ псалъэхэм къакIэлъыкIуащ выс­тавкэм и цIэджэгъу «Мозаики Юга России» тхылъыр зи IэдакъэщIэкIхэм ящыщ Бычков Игорь иригъэкIуэкIа, лэжьыгъэм гупсэхуу и гугъу щищIа лекцэр. Къызэхуэсахэм ар зэрафIэгъэщIэгъуэныр я нэгум къибджы­кIырт, ахэр зыщIэупщIэну хуейхэри мащIэтэкъым. 
Пэшым щагъэлъагъуэ лэжьыгъэ­хэм, мозаикэхэр къызытещ сурэтхэм я нэхъыбэр ди республикэм и гъэтIы­лъыгъэхэм ящыщщ. Ахэр зыфIэгъэщIэгъуэнхэр фепIэщIэкI, гъэлъэгъуэныгъэр зыхуамыщIыж щIыкIэ.  

ИСТЭПАН Залинэ. 
Сурэтхэр Къарей Элинэ трихащ.